کیہ خلع لین تے حق مہر چھڈن دی قدغن لگ سکدی؟ شریعت اپیلٹ بینچ

کجھ ٹولیاں امیر بندیاں نال ویاہ توں بعد تھوڑے ای ویلے وچ خلع لے لیندیاں نے : جسٹس ملک شہزاد؛ قرآن پاک وچ اے کہ عورت لوڑ پین تے کجھ دے کے وکھری ہو سکدی اے : ریمارکس؛ کیہ لفظ “کجھ” دی تشریح لئی کوئی معیار طے کیتا جا سکدا اے؟ جسٹس مندوخیل؛ دو عدالتی معاون مقرر

اسلام آباد (کورٹ رپورٹر) سپریم کورٹ دے شریعت اپیلٹ بینچ نے خلع دے ویلے زنانی (خاتون) نوں ادھا حق مہر موڑن نال متعلق اہم مقدمے دی سماعت کردیاں اسلامی نظریاتی کونسل دے سابق سربراہ شعبہ تحقیق ڈاکٹر انعام اللہ تے سینئر ایڈووکیٹ ڈاکٹر بابر اعوان نوں عدالتی معاون مقرر کر دتا، جد کہ ہور سماعت گرمیاں دیاں چھٹیاں توں بعد تک ملتوی کر دتی۔ جسٹس جمال مندوخیل دی سربراہی وچ پنج رکنی شریعت اپیلٹ بینچ نے سماعت کیتی۔ بابر اعوان نے جسٹس ڈاکٹر خالد مسعود نوں مخاطب کردیاں کہیا “گڈ ٹو سی یو”۔ جسٹس جمال مندوخیل نے ہسدیاں ریمارکس دتے کہ کیہ باقی ججاں نوں دیکھ کے چنگا نہیں لگا؟ بابر اعوان نے جواب دتا کہ ساریاں نوں دیکھ کے خوشی ہوئی۔ جسٹس ملک شہزاد احمد دے “گڈ ٹو سی یو” کہن تے عدالت وچ ہاسا مچ گیا۔ جسٹس ملک شہزاد احمد نے ریمارکس دتے کہ اصل سوال ایہ اے کہ کیہ خلع لین دی صورت وچ زنانی تے حق مہر چھڈن دی کوئی قدغن لائی جا سکدی اے۔

اوہناں نے کہیا وفاقی شرعی عدالت قرار دے چکی اے کہ عورت تے ادھا حق مہر موڑن دی لازمی شرط نہیں لائی جا سکدی، جد کہ قرآن پاک وچ ایہ وی بیان کیتا گیا اے کہ عورت لوڑ پین تے کجھ دے کے وکھری ہو سکدی اے۔ ڈاکٹر بابر اعوان نے مؤقف اختیار کیتا کہ اردو وچ لفظ “کجھ” توں مراد حصّہ (جزو) وی ہو سکدا اے، ایس اہم نقطے دی عدالتی تشریح ضروری اے۔ جسٹس جمال مندوخیل نے پُچھیا کہ کیہ لفظ “کجھ” دی تشریح لئی کوئی معیار طے کیتا جا سکدا اے؟ جسٹس ڈاکٹر خالد مسعود نے کہیا ایہ وی دیکھنا ہووے گا کہ قرآن پاک وچ ایس لفظ دی تفسیر کیہ بیان کیتی گئی اے۔ بابر اعوان نے عدالت نوں دَسیا کہ ادھے یا پورے حق مہر دی واپسی دے معاملے تے کئی زنانیاں دا استحصال کیتا جاندا اے۔ جسٹس ملک شہزاد احمد نے ریمارکس دتے کہ بعض اوقات استحصال دوہاں پاسیاں توں ہوندا اے تے کجھ ٹولیاں امیر بندیاں نال ویاہ توں بعد تھوڑے ای ویلے وچ خلع لے لیندیاں نے۔ بعد وچ سماعت گرمیاں دیاں چھٹیاں توں بعد تک ملتوی کر دتی گئی۔