عامر رضا دی جنرل دے عہدے اُتے ترقی، پہلے کمانڈر نیشنل سٹریٹجک کمانڈ مقرر
چیف آف جنرل سٹاف دے عہدے تے فائز سن، وزیراعظم دی جنرل عامر رضا نوں ترقی تے نئی ذمہ داری سنبھالن تے مبارکباد
اسلام آباد (نامہ نگار، مانیٹرنگ ڈیسک) وزیراعظم محمد شہباز شریف نے پاکستان آرمی دے چیف آف جنرل سٹاف لیفٹیننٹ جنرل عامر رضا، ہلالِ امتیاز (ملٹری)، ستارۂ بسالت نوں فور سٹار جنرل دے عہدے تے ترقی دے کے اوہناں نوں پہلا کمانڈر نیشنل سٹریٹجک کمانڈ مقرر کرن دا اعلان کر دتا۔ وزیراعظم آفس توں جاری بیان دے مطابق وزیراعظم نے جنرل عامر رضا، ہلالِ امتیاز (ملٹری)، ستارۂ بسالت نوں ترقی تے نئی ذمہ داری سنبھالن تے مبارکباد دتی تے ایس اہم عُہدے دیاں ذمہ داریاں چنگے طریقے نال نبھاؤن لئی اوہناں لئی نیک خواہشات دا اظہار کیتا۔ چیتے رہے کہ پچھلے ورھے 27ویں آئینی ترمیم دی منظوری توں بعد آرمی ایکٹ دے تحت چیئرمین جوائنٹ چیفس آف سٹاف کمیٹی دا عہدہ ختم کر کے اوہدی تھاں کمانڈر آف نیشنل سٹریٹجک کمانڈ دا عہدہ متعارف کرایا گیا سی۔
آرمی ایکٹ وچ ہون والی ایس ترمیم دے مطابق ایس عہدے تے چیف آف ڈیفنس فورسز دی سفارش تے وزیراعظم پاکستانی تھل فوج (بری فوج) دے اک جنرل نوں تن سال لئی تعینات کر سکدے ہن۔ ترمیم دے تحت قومی مفاد وچ وزیراعظم کمانڈر آف نیشنل سٹریٹجک کمانڈ دی ملازمت دی مدّت آرمی چیف دی سفارش تے ہور تن سال لئی ودھا وی سکدے ہن تے ایس فیصلے نوں عدالت وچ چیلنج نہیں کیتا جا سکے گا۔ ایس توں علاوہ ایس عہدے تے تعینات فوجی جنرل تے آرمی ایکٹ دے تحت ریٹائرمنٹ دی عمر تے ہور قاعدے قانون لاگو نہیں ہون گے۔
