دہشت گردی دے پچھے بھارت، مل کے ایس چیلنج دا مقابلہ کرنا پوے گا: شہباز شریف
افغان حکومت دہشت گرد تنظیماں خلاف کارروائی وچ ناکام، ترقی لئی چاراں صوبیاں دیاں یکساں کوششاں لازمی: بلوچستان نیشنل ورکشاپ نال خطاب؛ سکائی 47 ناقابلِ تسخیر سکیورٹی فراہم کرے گا: وزیراعظم؛ فیلڈ مارشل عاصم منیر دے نال ملک دے سب توں وڈے ڈیٹا سنٹر، اے آئی کلاؤڈ دا افتتاح
اسلام آباد (نامہ نگار) وزیراعظم شہباز شریف نے کہیا کہ ملک وچ دہشت گردی دے پچھے بھارت دا ہاتھ اے، ایس چیلنج نال سانوں مل کے نپٹنا پوے گا، افغانستان نوں سمجھاؤن دی کوشش کیتی اے کہ وہ افغان زمین پاکستان دے خلاف استعمال نہ ہون دیوے۔ افغان عبوری حکومت دہشت گرد تنظیماں خلاف کارروائی وچ ناکام رہی، وفاقی حکومت بلوچستان دی ترقی تے خوشحالی لئی بھرپور وسائل دی فراہمی یقینی بنائے گی، ترقی لئی چاراں صوبیاں دیاں یکساں کوششاں لازمی ہن، سارے صوبے برابری نال ترقی کرن گے تاں ہی ملک ترقی کرے گا۔ ایہناں خیالات دا اظہار اوہناں نے “بلوچستان نیشنل ورکشاپ” دے شرکا نال خطاب کردیاں کیتا۔ اوہناں کہیا کہ بلوچستان دی صورتحال ایس حوالے نال وکھری اے، شہراں، پنڈاں تے قصبیاں دے وچکار فاصلے بہت زیادہ ہن، دور دراز علاقیاں دی ترقی لئی لمے فاصلیاں پاروں وسائل نسبتاً زیادہ چاہیدے ہن، 2010ء وچ این ایف سی ایوارڈ وچ ایس معاملے نوں منیا گیا تے باقی تن صوبیاں بالخصوص پنجاب نے مل کے خوشی نال بلوچستان دا مالی حق 100 فیصد ودھاؤن دے مطالبے نوں پورا کیتا تے ایس وچ ودھ چڑھ کے حصہ پایا، پنجاب نے 11 ارب روپے سالانہ دتے۔
وزیراعظم نے کہیا ایہہ کوئی احسان نہیں سی بلکہ بھراچار دی اک عظیم مثال سی، دکھ سکھ ونڈاؤں دے جذبے دا مظاہرہ کیتا گیا۔ پنجاب 2010ء توں ہن تک 150 ارب روپے ایس سلسلے وچ فراہم کر چکا اے تے ایہہ سلسلہ ہن وی جاری اے۔ بلوچستان وچ کسَاں نوں کئی کئی گھنٹے بجلی دی بندش دا ساہمنا سی، اوہناں دے ہور وی مسئلے سن جنہاں نوں حل کرن لئی تقریباً 27 ہزار ٹیوب ویلاں نوں سولر (شمسی) توانائی تے منتقل کیتا گیا، 75 ارب روپے دے ایس منصوبے وچ 50 ارب روپے وفاق نے دتے۔ ایسے۔طرح کراچی توں چمن تک این 25 جیہنو خونی سڑک کہیا جاندا سی تے روز ایکسیڈنٹ ہوندے سن، ایس پرانے مطالبے نوں پورا کرن لئی پچھلے ورھے تیل دی قیمت وچ کمی دی مد وچ جمع ہون والی رقم توں کراچی توں چمن تک دو رویہ سڑک بناؤن دا فیصلہ کیتا، 300 ارب روپے دا ایہہ منصوبہ اگلے ڈیڑھ دو سال وچ مکمل ہووے گا تاں ایس خونی سڑک نوں امن دی سڑک قرار دتا جائے گا۔
اوہناں کہیا سیشن جج عبدالحکیم تے اوہناں دے نال اک اہلکار نے شہادت دا جام پیتا، ملک دی حفاظت لئی عوام دے نال نال افواجِ پاکستان تے قانون نافذ کرن والے اداریاں دے افسر تے جوان قربانیاں دے رہے ہن، ہن تک دہشت گردی دے خاتمے دی جنگ وچ 90 ہزار پاکستانی شہید ہو چکے ہن۔ پاکستان وچ دہشت گردی دے پچھے بھارت دا ہاتھ اے تے اوہ وسائل فراہم کر رہا اے، ایس وچ ہور وی وجہاں شامل ہن، 2017-18ء وچ ملک توں دہشت گردی دا مکمل خاتمہ ہو گیا سی پر اوہدے توں بعد دہشت گردی نے پھر سر چکیا، اک انتہائی منظم سازش نال دہشت گردی دوبارہ پرِت آئی، دہشت گردی ساڈے لئی اک چیلنج اے، اساں سبھ نے مل کے ایہدا مقابلہ کرنا اے۔ ہن دے دناں وچ اللہ تعالیٰ نے پاکستان نوں عظیم کامیابیاں دتیاں ہن۔ معرکہِ حق وچ بھارت نوں چار دناں وچ کراری ہار ہوئی، ایویں ای سفارتکاری دے ذریعے پاکستان نے خطے وچ امن دی بحالی لئی مرکزی کردار ادا کیتا، ایس نال دنیا وچ پاکستان نوں بہت عزت ملی اے، ایہہ عزت تے وقار دشمن توں ہضم نہیں ہو رہا، ویلا آ گیا اے کہ ملک نوں معاشی ترقی دی دوڑ وچ اگے لے کے جائیے، موقعیاں توں فائدہ چک کے سانوں چاراں صوبیاں وچ ترقی تے خوشحالی لیاونی پوے گی، ایس لئی سانوں دن رات مل کے اݨ تھک محنت کرنی پوے گی۔
ایس دوران وزیراعظم شہباز شریف تے چیف آف ڈیفنس فورسز فیلڈ مارشل سید عاصم منیر نے پاکستان دے سب توں وڈے ڈیٹا سنٹر تے اے آئی کلاؤڈ سکائی 47 قراقرم ون دا افتتاح کر دتا، جدکہ وزیراعظم شہباز شریف نے کہیا اے کہ متحرک، ترقی پسند تے شاندار مستقبل لئی سکائی 47 منصوبہ انتہائی اہم پیش رفت اے، اوکڑاں تے چیلنجاں دا امید تے حوصلے نال مقابلہ کریے تاں معرکہِ حق جیسے تاریخی کارنامے جنم لیندے ہن، ایہہ منصوبہ پاکستان دے مستقبل دی ضمانت اے تے ملک نوں ناقابلِ تسخیر سکیورٹی فراہم کرے گا، اکٹھ مل کے کم کریے تاں کوئی وی ہدف ناپائیدار نہیں۔ سکائی 47 جیسے عظیم منصوبے پاکستان دے مستقبل دی ضمانت ہن، فیلڈ مارشل سید عاصم منیر دی وڈی سوچ والی قیادت، ساجھے دار زیڈ ٹی ای، وفاقی وزیر انفارمیشن ٹیکنالوجی تے سیکرٹری انفارمیشن ٹیکنالوجی نوں بھرپور ساتھ تے خراجِ تحسین پیش کردا ہاں۔
