5 اگست دا جلسہ فیصلہ کن، اگلا لائحہ عمل دیاں گے: سہیل آفریدی

وفاق خیبر پختونخوا حکومت نال دوجے درجے دے شہری ورگا سلوک کر رہا اے؛ بانی دی فیملی، بھیناں تے ذاتی ڈاکٹراں نوں ملن تے بہترین علاج دی سہولت دتی جائے

پشاور (مانیٹرنگ ڈیسک) وزیراعلیٰ خیبر پختونخوا سہیل آفریدی نے کہیا اے کہ 5 اگست دے جلسے دی تیاریاں لئی سارے پارلیمانی ممبراں نوں ذمہ داریاں سونپ دتیاں گئیاں ہن، 5 اگست دا جلسہ سیمی فائنل تے فیصلہ کن ہووے گا، اگلا لائحہ عمل قوم دے سامنے رکھیا جائے گا۔ سہیل آفریدی نے پارلیمانی اجلاس نال خطاب کردیاں کہیا کہ عوام دی سہولت لئی پنج اگست دے جلسے دی تھاں بدل کے پشاور موٹروے دے نیڑے کھلے میدان وچ منتقل کر دتی گئی۔ اوہناں کہیا کہ 15 اکتوبر 2025ء توں سارے آئینی تے قانونی راستے اپنائے تے افہام و تفہیم نال مسئلے حل کرن دی ہر ممکن کوشش کیتی، پی ٹی آئی دی مرکزی قیادت وی گل بات تے افہام و تفہیم دے ذریعے مسئلیاں دے حل دی خواہاں سی، مخالفاں نے مثبت کوششاں دا کوئی جواب نہیں دتا۔

وزیراعلیٰ سہیل آفریدی نے کہیا کہ عمران خان نال ملن لئی اسلام آباد ہائی کورٹ تے سپریم کورٹ نال رجوع کیتا، اک تقریب وچ چیف جسٹس دے سامنے عمران خان نال ملن دا مؤقف پیش کیتا، بطور وزیراعلیٰ اپنی جماعت دے قائد نال ملنا میرا آئینی تے قانونی حق اے۔ اوہناں کہیا کہ وفاق خیبر پختونخوا دی منتخب حکومت نال دوجے درجے دے شہری ورگا سلوک کر رہا اے۔ اوہناں کہیا کہ عمران خان دی فیملی، بھیناں تے ذاتی ڈاکٹراں نوں ملاقات تے بہترین علاج دی سہولت دتی جائے، اوہناں کہیا کہ ساڈے تے فوجی تنصیبات تے حملیاں دے الزام لگائے گئے، نو مئی دی غیر جانبدار تحقیقات نال دُدھ دا دُدھ تے پانی دا پانی ہو جائے گا۔