مہنگائی دا مسلسل پنجواں وار، پٹرول 3.66 تے ڈیزل دی قیمت وچ 4.80 روپے وادھا

مٹی دا تیل وی 2 روپے 99 پیسے مہنگا، پٹرول دی نئی قیمت 335 روپے 18 پیسے، ڈیزل دی 383 روپے 46 پیسے لٹر ہو گئی

اسلام آباد (نامہ نگار، مانیٹرنگ ڈیسک) مہنگائی دا مسلسل پنجواں وار، پٹرول تے ڈیزل دیاں قیمتاں وچ پھر وادھا کر دتا گیا۔ پٹرولیم ڈویژن نے 25 جولائی لئی پٹرول تے ڈیزل دیاں قیمتاں وچ وادھے دا نوٹیفکیشن جاری کر دتا جس دے مطابق پٹرول دی فی لٹر قیمت وچ 3 روپے 66 پیسے دا وادھا کیتا گیا جس توں بعد پٹرول دی نئی قیمت 335 روپے 18 پیسے فی لٹر ہو گئی۔ ڈیزل دی فی لٹر قیمت وچ وی 4 روپے 80 پیسے دا وادھا کیتا گیا، ڈیزل دی نئی قیمت 383 روپے 46 پیسے فی لٹر ہو گئی۔ مٹی دے تیل دی قیمت وچ وی 2 روپے 99 پیسے وادھا کر دتا گیا، مٹی دے تیل دی نئی قیمت 301 روپے 14 پیسے فی لٹر مقرر ہو گئی۔ رپورٹ دے مطابق 17 جولائی توں 25 جولائی دے دوران پٹرول دی فی لٹر قیمت وچ مجموعی طور تے 24 روپے 47 پیسے جدکہ ہائی سپیڈ ڈیزل دی قیمت وچ 60 روپے 16 پیسے دا وادھا کیتا گیا۔