آزاد کشمیر الیکشن: میرپور ڈویژن دے 13 حلقیاں وچ اج پولنگ، 17 ہزار سکیورٹی اہلکار تعینات

پولنگ صبح 8 توں شام 5 وجے تک بغیر وقفے جاری رہے گی، 14 لکھ توں وادھ ووٹراں لئی 2316 پولنگ سٹیشن و پولنگ بوتھ قائم، 1241 انتہائی حساس، 724 حساس قرار؛ پولنگ میٹریل آر اوز تک پہنچا دتا گیا، رکاوٹاں پاؤن والیاں خلاف سخت قانونی کارروائی ہووے گی: چیف سیکرٹری؛ عوام بے یقینی دا جواب ووٹ نال دین: سیکرٹری الیکشن کمیشن

مظفرآباد، میرپور (بیورو رپورٹ، اے پی پی، دنیا نیوز) آزاد کشمیر وچ عام چوناں (انتخابات) دے پہلے مرحلے وچ میرپور ڈویژن دے 13 انتخابی حلقیاں وچ پولنگ اج ہووے گی، جتھے 14 لکھ توں وادھ ووٹر 288 امیدواراں وچوں اپنے نمائندیاں نوں چُنن گے۔ میڈیا پولنگ مکݨ دے 2 گھنٹیاں بعد غیر حتمی تے غیر سرکاری نتیجے جاری کر سکے گا، پولنگ صبح 8 توں شام 5 وجے تک بغیر وقفے دے جاری رہے گی۔ میرپور ڈویژن وچ 2316 پولنگ سٹیشن تے پولنگ بوتھ قائم کیتے گئے ہن جنہاں وچ 1241 انتہائی حساس، 724 حساس تے 351 نارمل پولنگ سٹیشن شامل ہن۔ میرپور ڈویژن وچ مجموعی طور تے 14 لکھ 437 ووٹر رجسٹرڈ ہن جنہاں وچ 7 لکھ 24 ہزار 811 مرد تے 6 لکھ 75 ہزار 626 سوانیاں (خواتین) ووٹر شامل ہن۔ انتظامات تے سکیورٹی دی نگرانی لئی ڈویژن بھر وچ 13 زونز تے 205 سیکٹرز قائم کیتے گئے ہن۔ میرپور ڈویژن وچ پولیس تے دوجے قانون نافذ کرن والے اداریاں دے مجموعی طور تے 17 ہزار اہلکار تعینات ہون گے، جس وچ ضلع میرپور لئی 5536، بھمبر لئی 4504 تے ضلع کوٹلی لئی 8520 اہلکار شامل ہن۔ سکیورٹی دا تن پدھری (سطحی) نظام بنایا گیا اے، ایس نظام تحت پولیس پہلی لائن (فرسٹ ٹیئر) دے طور تے کم کرے گی، سول آرمڈ فورسز دوجی لائن (سیکنڈ ٹیئر) جدکہ پاک فوج تیجی لائن (تھرڈ ٹیئر) دے طور تے خدمات انجام دیوے گی۔ پاک فوج دے 2100 جوان وی انتخابی سکیورٹی لئی تعینات کیتے جان گے۔

مظفرآباد وچ سیکرٹری الیکشن کمیشن راجہ محمد شکیل خان نال پریس کانفرنس کردیاں چیف سیکرٹری خوشحال خان نے کہیا کہ آئین دے مطابق آزاد کشمیر وچ انتخابی عمل دا باقاعدہ آغاز اج توں ہووے گا، انتخابات دے سارے انتظامات مکمل کر لئی گئے ہن تے پولنگ میٹریل سارے ریٹرننگ افسراں تک پہنچا دتا گیا اے۔ اوہناں کہیا کہ آزاد کشمیر وچ ایس ویلے انتخابی ماحول اپنے عروج تے اے، وکھو وکھ علاقیاں وچ کارنر میٹنگاں، بینر، پوسٹر تے سیاسی جماعتاں دے جھنڈے نمایاں ہن جدکہ سیاسی جماعتاں دی مرکزی قیادت وی انتخابی مہم دے لنگھم وچ آزاد کشمیر وچ موجود اے۔ اوہناں ایس امید دا اظہار کیتا کہ ایس واری وی عوام بھرپور جوش و جذبے نال جمہوری عمل وچ حصہ لیندے ہوئیاں اپنے نمائندیاں نوں چُنن گے۔ اوہناں کہیا کہ انتخابات دوران امن خراب کرن یا انتخابی عمل وچ رکاوٹ پاؤن والیاں خلاف سخت قانونی کارروائی ہووے گی، سوشل میڈیا تے گمراہ کن پروپیگنڈا پھیلاؤن والیاں تے کڑی نظر رکھی جا رہی اے۔ ایس موقعے تے سیکرٹری الیکشن کمیشن نے کہیا کہ 22 ہزار انتخابی عملہ تعینات کر دتا گیا اے، ساریاں تیاریاں مکمل ہن تے چیف الیکشن کمشنر نے میرپور دا دورہ کیتا تے انتظامات نوں تسلی بخش قرار دتا۔ سیکرٹری الیکشن کمیشن نے کہیا کہ سوشل میڈیا تے بائیکاٹ بارے پرانیاں ویڈیو چلا کے بے بنیاد تاثر دتا جا رہا اے، اوہناں دا کہنا سی کہ عوام بے یقینی دا جواب ووٹ نال دین تے اپنے من بھاؤندے نمائندے دا انتخاب کرن۔