کویت حکومت نے پاکستان نال دفاعی تعاون دے معاہدے دی باضابطہ منظوری دے دتی
معاہدہ سرکاری گزٹ وچ شائع، عملدرآمد تے نگرانی لئی مشترکہ فوجی کمیٹی بنے گی، ارکان دوہاں ملکاں دے وزرائے دفاع نامزد کرن گے، کمیٹی دا سال وچ گھٹو گھٹ اک اجلاس ہووے گا؛ خفیہ معلومات، دستاویزاں تے حساس مواد دے تحفظ بارے دفعات وی شامل، کلاسیفائیڈ معلومات نوں دوجے فریق دی اجازت توں بغیر تیجے فریق نال شیئر نہیں کیتا جا سکے گا: متن
اسلام آباد (مانیٹرنگ ڈیسک) کویتی حکومت نے پاکستان تے کویت دے وچکار دفاعی تعاون دے معاہدے دی باضابطہ منظوری دے دتی، جس نوں حکم نامہ نمبر 73 آف 2026ء تحت سرکاری گزٹ “کویت الیوم” وچ شائع کر دتا گیا اے۔ عرب میڈیا دے مطابق ایہہ معاہدہ 11 جون 2023ء نوں کویت وچ طے پایا سی، جس دا مقصد دوہاں ملکاں دے وچکار دفاعی تعلقات نوں ہور مضبوط بنانا تے فوجی تربیت، تعلیم تے مسلح افواج دے مابین تعاون لئی اک جامع فریم ورک فراہم کرنا اے۔ معاہدے تحت باہمی اتفاق نال فوجی تربیت و تعلیم، لاجسٹک تعاون، فوجی اہلکاراں دے تبادلے، تکنیکی ماہرین، سائنسی و تکنیکی تعاون، ملٹری انٹیلی جنس تے دوجے دفاعی شعبیاں وچ تعاون نوں وادھا دتا جائے گا۔
ایہدے تے عمل درآمد لئی دوویں ملک سالانہ منصوبے تے ایگزیکٹو پروٹوکول ترتیب دین گے، جدکہ وکھو وکھ سطحاں تے سرکاری وفود دے تبادلیاں دا سلسلہ وی جاری رکھیا جائے گا۔ معاہدے تحت عمل درآمد، رابطہ کاری تے نگرانی لئی مشترکہ فوجی کمیٹی قائم کیتی جائے گی، جس دے ارکان دوہاں ملکاں دے وزرائے دفاع نامزد کرن گے تے ایہہ کمیٹی سال وچ گھٹو گھٹ اک واری اجلاس منعقد کرے گی۔ معاہدے وچ خفیہ معلومات، دستاویزاں تے حساس مواد دے تحفظ بارے سخت دفعات وی شامل ہن، جنہاں دے مطابق کسی وی کلاسیفائیڈ معلومات نوں دوجے فریق دی تحریری اجازت توں بغیر کسی تیجے فریق نال شیئر نہیں کیتا جا سکے گا۔ ایہہ رازداری معاہدے دے خاتمے توں بعد وی برقرار رہے گی۔ مالی انتظامات دے مطابق سرکاری وفود دے اندرونِ ملک سفر، رہائش تے ہنگامی طبی علاج دے خرچے میزبان ملک برداشت کرے گا، جدکہ کسی وی اختلاف دی صورت وچ معاملہ باہمی مشاورت نال حل کیتا جائے گا تے ایہنو کسی بین الاقوامی یا ملکی عدالت وچ نہیں لے جایا جائے گا۔
