امریکی کانگریس دے وفد دا لاہور دے تاریخی تھانواں تے گورنر ہاؤس دا دورہ

مزارِ اقبال تے حاضری، خراجِ عقیدت پیش؛ پنجاب سیف سٹیز اتھارٹی وی گئے؛ گورنر ہاؤس وچ مغل دور دیاں نوادرات تے تاریخی جنگی سامان وچ دلچسپی دا اظہار

لاہور (اپنے سٹی رپورٹر توں، کرائم رپورٹر) امریکی کانگریس دے ارکان ریان زنکے تے مائیکل بامگارٹنر تے مشتمل وفد نے لاہور دے تاریخی و ثقافتی تھانواں تے گورنر ہاؤس دا دورہ کیتا۔ وفد نے شاعرِ مشرق علامہ محمد اقبالؒ دے مزار تے حاضری دے کے خراجِ عقیدت پیش کیتا، جدکہ شاہی قلعہ، حضوری باغ، دیوانِ عام، دیوانِ خاص، شیش محل، عالمگیری دروازہ، پکچر وال تے بادشاہی مسجد دا وی تفصیلی دورہ کیتا۔ ایس موقعے تے ڈائریکٹر جنرل والڈ سٹی اتھارٹی نجم الثاقب نے وفد نوں لاہور دے تاریخی ورثے، ایہدے سانبھ سنبھال تے ثقافتی اہمیت بارے بریفنگ دتی۔ امریکی وفد نے تاریخی ورثے دے تحفظ تے بحالی دے منصوبیاں نوں سراہندیاں کہیا کہ ایسے اقدامات ثقافتی سیاحت دے فروغ وچ اہم کردار ادا کردے ہن۔ بعدوں امریکی وفد نے پنجاب سیف سٹیز اتھارٹی دا دورہ کیتا، جتھے منیجنگ ڈائریکٹر محمد احسن یونس تے چیف آپریٹنگ آفیسر مستنصر فیروز نے اوہناں دا استقبال کیتا۔

وفد نوں جدید مصنوعی ذہانت (اے آئی)، انٹیگریٹڈ کمانڈ اینڈ کنٹرول سسٹم، سمارٹ سرویلنس، جدید کیمریاں تے پنجاب بھر وچ مانیٹرنگ دے نظام تے تفصیلی بریفنگ دتی گئی۔ وفد نوں پنجاب پولیس، قانون نافذ کرن والے اداریاں دے باہمی رابطے، ایمرجنسی ہیلپ لائن 15، ویمن سیفٹی ایپ، ورچوئل ویمن پولیس سٹیشن، ورچوئل چائلڈ سیفٹی سنٹر تے ٹریفک مینجمنٹ سسٹم توں وی آگاہ کیتا گیا۔ امریکی وفد نوں دورے دے اختتام تے یادگاری شیلڈ وی پیش کیتی گئی۔ ایس دوران امریکی کانگریس دے وفد نے گورنر ہاؤس دا وی دورہ کیتا تے گورنر پنجاب سردار سلیم حیدر خان نال ملاقات کیتی، گورنر سردار سلیم حیدر خان نے کہیا پاکستان علاقائی بحراناں دے حل تے امن و استحکام لئی مثبت کردار ادا کر رہا اے جدکہ امریکی کانگریسی وفد نے وی خطے وچ امن لئی پاکستان دیاں کوششاں نوں سراہیا تے کہیا کہ ایران تے امریکہ دے وچکار کشیدگی دوران پاکستان دا کردار قابلِ قدر اے۔ وفد نے گورنر پنجاب نوں امریکی دورے دی دعوت وی دتی، امریکی وفد نے گورنر ہاؤس وچ مغل دور دیاں نوادرات تے تاریخی جنگی سامان وچ خصوصی دلچسپی دا اظہار کیتا۔