پپلز پارٹی الیکشن وچ سنجیدہ ہندی تاں بلاول نہ بھجدا : عظمیٰ بخاری
کی انہاں کول دسݨ واسطے اپنی 17 سالہ صوبائی حکومت دی کارکردگی نئیں ؟ سالگرہ تے لاہور وچ خالی کرسیاں دا جلسہ زرداری دی توہین :وزیراطلاعات
لاہور(مانیٹرنگ ڈیسک )وزیر اطلاعات پنجاب عظمیٰ بخاری نے آکھیا اے جے پیپلز پارٹی آزاد کشمیر دے الیکشن وچ سنجیدہ ہندی تاں بلاول اپنے شیڈول جلسے کینسل کر کے نہ بھجدا ۔سندھ دے سینئر وزیر شرجیل میمن دے بیان تے رد عمل دیندیاں عظمیٰ بخاری نے آکھیا اے کہ پیپلز پارٹی دے ہر رہنما نے قسم چتی اے جتھے وی جانا اے مسلم لیگ (ن)تے ای تنقید کرنی اے۔
انہاں نے سوال چکیا اے کہ کیا پیپلزپارٹی دی قیادت کول دسݨ واسطے اپنی سترہ سال دی صوبائی حکومت دی کارکردگی نئیں ؟، پیپلز پارٹی دے رہنما کشمیریوں نوں الیکٹرک بسیں تے کلینک آن وہیلز ملݨ تے اینا غصہ کیوں کر رہے نیں؟،پیپلز پارٹی 17 سال وچ سندھ نوں ٹرانسپورٹ سسٹم نئیں دے سکی، مریم نواز نے 18 مہینیاں وچ پورے صوبے وچ الیکٹرک بسیں چلا دتیاں نیں۔
بلوچستان، خیبر پختونخوا تے آزاد کشمیر دے بچیاں نوں لیپ ٹاپ تے سکالرشپ دتے گئے، پنجاب تے آزاد کشمیر دے لوکاں نوں ریلیف ملݨ تے تسی تنقید شروع کر دیندے او۔ پیپلز پارٹی دا مسئلہ کی اے سانوں اکو واری دسو۔
کجھ ہور آکھدیاں عظمیٰ بخاری نے آکھیا اے کہ آصف زرداری نوں انہاں دی سالگرہ مبارک ہووے، شکر کرو مینار پاکستان وچ جلسے دی خفت توں چھٹکارا مل گیا،پیپلز پارٹی ولوں زرداری دی سالگرہ تے لاہور وچ خالی کرسیاں دا جلسہ کرنا زرداری دی توہین اے۔
انہاں نے آکھیا اے کہ پچھلی رات گورنر ہاؤس پنجاب وچ خالی کرسیاں دا جم غفیر سی، کرسیاں دو ہزار سن تے جلسے وچ بندے ڈیڑھ سو سن، اے لوک جتنی توجہ پنجاب حکومت تے رکھدے نیں اتنی اپنی پارٹی تے توجہ دیندے تاں اڄ پنجاب وچ پیپلز پارٹی دا اے حال نہ ہوندا۔
