سعودی عرب وِچ تیل دیاں تنصیبات تے یمنی حوثیاں دے ڈرون حملے : عراقی گروہاں دی ریاض نوں نشانہ بنان دی کوشش ناکام
امریکہ نوں گولہ بارود دی کوئی کمی نہیں، وافر مقدار موجود اے، ایران نال ڈاہڈے سنجیدہ مذاکرات ہو رہے نے، جے ناکام ہوئے تے انتہائی سخت فوجی کارروائی دا حکم دیواں گا: ٹرمپ۔ امریکہ نال مذاکرات نہیں ہو رہے، آبنائے ہرمز فی الحال بند اے: ایران۔ عراق اپنی سرزمین توں ہون والے حملے بند کراوے: سعودی عرب۔ عالمی منڈی وِچ تیل 4 فیصد سستا۔
صنعاء (اے ایف پی، رائٹرز) یمن دے ایران نواز حوثی باغیاں نے پیر نوں کہیا اے کہ اوہناں نے سعودی عرب دے ڈرون حملیاں دے جواب وِچ مملکت دی تیل تنصیبات تے ڈرون حملے کیتے نے۔ حوثیاں دے ملٹری ترجمان یحییٰ سریع نے دسیا کہ مشرقی سعودی عرب توں ینبع تک خام تیل دی فراہمی تے منتقلی نال متعلق متعدد حساس اہداف نوں کئی ڈرونز دے ذریعے نشانہ بنایا گیا، اوہناں نے ایس ساحلی شہر (ینبع) دا حوالہ دِتا جِتھے خلیجی مملکت دی ایسٹ ویسٹ پائپ لائن بحیرہ احمر تک پہنچدی اے۔ دوجے پاسے سعودی وزارتِ دفاع نے پیر دے دہاڑے دسیا کہ اوہدی افواج نے عراق وِچ موجود ایران نواز گروہاں ولوں تیل دی تنصیبات نوں نشانہ بنان لئی بھیجے گئے متعدد ڈرونز نوں راہ وِچ ای روک کے تباہ کر دِتا۔
وزارتِ دفاع دے مطابق ایہناں ڈرونز دے ذریعے ملک دے مشرقی علاقیاں تے دارالحکومت ریاض نوں نشانہ بنان دی کوشش کیتی جا رہی سی۔ سعودی عرب نے مطالبہ کیتا کہ عراق اپنی سرزمین نوں حملیاں لئی استعمال ہون توں روکے۔ دوجے پاسے امریکی صدر ٹرمپ نے ایران نال مذاکرات دے ذریعے امن معاہدے دے امکانات تے امید دا اظہار کردے ہوئیاں کہیا اے کہ مثبت پیش رفت دا اچھا امکان موجود اے۔ ایئر فورس ون وِچ صحافیاں نال گفتگو دوران اوہناں نے کہیا کہ اوہناں کول کافی صبر اے تے دیکھنا ہووے گا کہ اگے کیہ ہندا اے۔ ٹرمپ نے امریکی خبر رساں ادارے ایکسیوس نوں دسیا کہ ثالث ملکاں نے سفارتی عمل نوں موقع دین لئی حملے روکن دی درخواست کیتی سی۔
اوہناں دے بقول امریکہ ایران نال ڈاہڈے سنجیدہ مذاکرات کر رہیا اے، تاہم جے نویاں سفارتی کوششاں ناکام ہوئیاں تے واشنگٹن جنگ بندی توں پہلاں اختیار کیتی گئی فوجی حکمت عملی دوبارہ اپنائے گا، جے مذاکرات ناکام ہوئے تے انتہائی سخت فوجی کارروائی دا حکم دیواں گا۔ صدر ٹرمپ نے ایس تاثر نوں وی مسترد کیتا کہ پنج مہینیاں توں جاری جنگ پاروں امریکہ دے گولہ بارود دے ذخائر گھٹ ہو رہے نے۔ اوہناں نے کہیا کہ امریکہ کول اسلحہ تے گولہ بارود وافر مقدار وِچ موجود اے تے درمیانے درجے دے ہتھیار وی لوڑ توں کہیں زیادہ نے۔ ایس توں علاوہ ایران دی وزارتِ خارجہ نے پیر نوں کہیا اے کہ دونوں فریقین دے وچکار حالیہ لڑائی وِچ وقفے دے باوجود، اوہ فی الحال امریکہ نال کسی مذاکرات وِچ شامل نہیں اے۔
وزارتِ خارجہ دے ترجمان اسماعیل بقائی نے ہفتہ وار پریس بریفنگ دوران کہیا کہ ثالث خطے دی موجودہ صورتحال نال متعلق امریکہ دی طرفوں سانوں پیغامات پہنچا سکدے نے، لیکن ایس ویلے، اسیں امریکہ نال کسی وی قسم دے مذاکرات وِچ مصروف نہیں آں۔ ایران دے پاسدارانِ انقلاب نے حالیہ دناں وِچ متعدد بحری جہازاں نوں موڑ دِتا اے، جنہاں وِچوں چھ نوں پیر دے دہاڑے ای موڑیا گیا، جنہاں نے ایران دے مقرر کردہ راستے توں باہروں آبنائے ہرمز عبور کرن دی کوشش کیتی سی۔ پیر دے دہاڑے اسماعیل بقائی نے ایس بات دا اعادہ کیتا کہ آبنائے ہرمز دے انتظام بارے عمان نال حال ای وِچ ہون والی بات چیت دا واشنگٹن نال کوئی تعلق نہیں اے، ایہ آبی گزرگاہ فی الحال بند ای رہے گی۔ مزید براں امریکہ تے ایران دی طرفوں فائرنگ روکن دے فیصلے نال خلیجی بحری جہاز رانی تے تیل دی صنعت نوں وڈی راحت ملی، جیہدے بعد بین الاقوامی معیار دے حامل برینٹ کروڈ دی قیمت 4 فیصد توں ودھ گھٹ کے 87 ڈالر فی بیرل تے آ گئی۔
