فیلڈ مارشل نال امریکی کانگریس دے وفد دی ملاقات، دفاعی تے اقتصادی تعاون ودھان تے اتفاق
پائیدار علاقائی استحکام دی بنیاد مضبوط اقتصادی ترقی، تجارت دے فروغ تے علاقائی رابطیاں تے استوار اے: سید عاصم منیر۔ امریکی وفد نے علاقائی استحکام، اقتصادی مضبوطی وِچ پاکستان دے کردار نوں سراہیا، پرتپاک مہمان نوازی تے اظہارِ تشکر۔
راولپنڈی، اسلام آباد (دنیا نیوز، مانیٹرنگ ڈیسک) امریکی ایوانِ نمائندگان دے ارکان ریان کیتھ زنکے تے مائیکل جیمز نے جنرل ہیڈکوارٹرز (جی ایچ کیو) دا دورہ کیتا تے چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر نال ملاقات کیتی۔ پاک فوج دے شعبہ تعلقاتِ عامہ (آئی ایس پی آر) دے مطابق ملاقات دوران باہمی دلچسپی دے امور، علاقائی سلامتی، دوطرفہ دفاعی تعاون تے اقتصادی تعاون و خوشحالی دے فروغ دے امکانات تے تفصیلی تبادلہ خیال کرن دے نال نال پاک امریکہ باہمی تجارت دے فروغ تے اقتصادی رابطے مزید مضبوط بنان تے اتفاق وی کیتا گیا۔
ترجمان پاک فوج دے مطابق فیلڈ مارشل سید عاصم منیر نے ایس موقعے تے پاکستان دی وسیع اقتصادی صلاحیتں نوں اجاگر کردے ہوئیاں کہیا کہ پائیدار علاقائی استحکام دی بنیاد مضبوط اقتصادی ترقی، تجارت دے فروغ تے علاقائی رابطیاں تے استوار اے، پاکستان کاروبار دوست ماحول دی تشکیل تے غیر ملکی سرمایہ کاری نوں راغب کرن لئی جامع ساختی اصلاحات تے عمل پیرا اے۔ آئی ایس پی آر دے مطابق امریکی وفد نے علاقائی استحکام تے اقتصادی مضبوطی وِچ پاکستان دے اہم کردار نوں سراہیا تے پرتپاک مہمان نوازی تے عسکری قیادت دا شکریہ ادا کردے ہوئیاں اقتصادی، تجارتی تے ادارہ جاتی رابطیاں نوں مزید مضبوط بنان دے مشترکہ عزم دا اظہار کیتا۔
