اوپن مارکیٹ وِچ کنک مہنگی، 48 سو روپے من تک وکن لگی
لاہور وِچ 10 تے 20 کلو آٹے دے تھیلیاں دی قلت، زائد قیمت وصول کرن والیاں خلاف کریک ڈاؤن جاری: ضلعی انتظامیہ۔
لاہور (عمران اکبر) اوپن مارکیٹ وِچ کنک دی قیمت وِچ اچانک اپنے آپ ای اک ہزار روپے فی من وادھا کر دِتا گیا جیہدے بعد آٹے تے روٹی دیاں قیمتاں وِچ وی نمایاں وادھا ہو گیا۔ اوپن مارکیٹ وِچ کنک 4800 روپے فی من جدکہ راولپنڈی وِچ 4900 روپے فی من تک وکن لگی اے، جیہدے پاروں لاہور وِچ 10 تے 20 کلو آٹے دے تھیلیاں دی قلت پیدا ہو گئی۔ مارکیٹ سروے دے مطابق 10 کلو آٹے دا تھیلا 1125 روپے تے 20 کلو آٹے دا تھیلا 2250 روپے وِچ وک رہیا اے، جدکہ 15 کلو آٹے دا تھیلا 2150 روپے وِچ ویچیا جا رہیا اے، جیہڑا تقریباً 20 کلو آٹے دے تھیلے دے برابر قیمت تے دستیاب اے۔
ذرائع دے مطابق متعدد سٹوراں تے 10 تے 20 کلو آٹے دے تھیلے دستیاب نہیں، جدکہ جِتھے دستیاب نے اوتھے وی محدود سپلائی کیتی جا رہی اے۔ دوجے پاسے ڈی جی فوڈ امجد حفیظ نے سرکاری کنک دا ریٹ 3800 روپے فی من برقرار رکھن تے لاہور سمیت پورے صوبے وِچ آٹے دی مناسب سپلائی دا دعویٰ کیتا اے، تاہم ایس حوالے نال ہلے تک کوئی نواں سرکاری نوٹیفکیشن جاری نہیں کیتا گیا۔ آٹے دی قیمت ودھن توں بعد لاہور دے مختلف علاقیاں وِچ روٹی وی اپنے آپ ای مہنگی کر دِتی گئی اے۔ رائیونڈ، ملتان روڈ، جوہر ٹاؤن، فیصل ٹاؤن، واپڈا ٹاؤن، ویلنشیا، اقبال ٹاؤن، ماڈل ٹاؤن تے گارڈن ٹاؤن سمیت زیادہ تر علاقیاں وِچ سادی روٹی 22 توں 25 روپے جدکہ انارکلی، مال روڈ، اسلام پورہ، سنت نگر، باغبانپورہ تے شاہدرہ وِچ 20 روپے وِچ وک رہی اے۔
نان دی قیمت وی 30 روپے تک پہنچ گئی اے۔ نان روٹی ایسوسی ایشن دا کہنا اے کہ آٹے دی قیمت وِچ مسلسل وادھے نال تندور مالکان شدید مالی مشکلاں دا شکار نے۔ اوہناں دے مطابق موجودہ سرکاری نرخ تے روٹی ویچنا ممکن نہیں کیونکہ آٹے دی بوری مہنگی ہون نال پیداواری لاگت وِچ نمایاں وادھا ہو چکا اے۔ دوجے پاسے ضلعی انتظامیہ دا موقف اے کہ سرکاری نرخ دے مطابق روٹی 14 روپے وِچ وکنی چاہی دی اے تے زائد قیمت وصول کرن والیاں خلاف کریک ڈاؤن جاری اے، تاہم ہلے تک کنک، آٹے تے روٹی دیاں قیمتاں دا کوئی نواں سرکاری نوٹیفکیشن جاری نہیں کیتا گیا جدکہ اوپن مارکیٹ وِچ تناں شے واں اپنے آپ ای مہنگے دامن وک رہیاں نے۔o
