لاہور ہائیکورٹ: مشکوک شہریت دے مقدمیاں وِچ سول عدالتاں دا دائرہ اختیار ختم
ایسے معاملیاں وِچ نادرا ویری فکیشن بورڈ تے شہریت ایکٹ 1951 تحت دستیاب قانونی فورمز نال رجوع کرنا لازم قرار، سول عدالتاں نوں متبادل قانونی فورمز نال رجوع کیتے بغیر ایسے دعویاں نوں سنن دا اختیار نہیں: جسٹس محسن اختر کیانی دا فیصلہ۔
لاہور (کورٹ رپورٹر) لاہور ہائیکورٹ نے نادرا تے شہریت دے تنازعیاں تے اہم فیصلہ جاری کردے ہوئیاں مشکوک شہریت دے مقدمیاں وِچ سول عدالتاں دا دائرہ اختیار ختم کر دِتا، جدکہ نادرا دے فیصلیاں خلاف پہلے قانونی فورمز نال رجوع کرنا لازم قرار دیندے ہوئیاں نادرا دی اپیل منظور کر لئی۔ لاہور ہائیکورٹ نے قومی شناختی کارڈز تے شہریت دے تنازعیاں نال متعلق اک اہم تے نظیر بنن والا فیصلہ جاری کردے ہوئیاں قرار دِتا اے کہ مشکوک شہریت دے مقدمیاں وِچ براہِ راست سول عدالتاں یا رٹ پٹیشن دے ذریعے رجوع نہیں کیتا جا سکدا۔
عدالت نے واضح کیتا کہ ایسے معاملیاں وِچ پہلے نادرا ویری فکیشن بورڈ تے پاکستان شہریت ایکٹ 1951 تحت دستیاب قانونی فورمز نال رجوع کرنا لازمی ہووے گا، جسٹس محسن اختر کیانی نے نادرا دی سول نظرثانی درخواست تے 14 صفحات تے مشتمل تفصیلی فیصلہ جاری کیتا، وفاق دی طرفوں ڈپٹی اٹارنی جنرل راجہ خرم شہزاد نے دلائل دِتے، جیہنوں عدالتی نظیر قرار دِتا گیا اے۔ عدالت نے سینئر سول جج سیالکوٹ دے 19 جنوری 2017 تے ایڈیشنل ڈسٹرکٹ جج سیالکوٹ دے 23 اگست 2017 دے فیصلے کالعدم قرار دیندے ہوئیاں نادرا دی درخواست منظور کر لئی۔
عدالت نے قرار دِتا کہ سول عدالتاں نوں متبادل قانونی فورمز نال رجوع کیتے بغیر ایسے دعوے سنن دا اختیار حاصل نہیں۔ فیصلے وِچ کہیا گیا کہ جنہاں بندیاں دی شہریت مشکوک قرار دِتی جاوے، اوہ پہلے نادرا ویری فکیشن بورڈ نال رجوع کرن، جدکہ جے پاکستانی شہریت ثابت نہ ہو سکے تے پاکستان شہریت ایکٹ 1951 تحت وفاقی حکومت توں شہریت دا سرٹیفکیٹ حاصل کرنا ضروری ہووے گا۔ عدالت نے ہدایت کیتی کہ شہریت دے دعویاں وِچ والد یا دادا دی 1979 توں پہلاں پاکستان وِچ رہائش دے مستند ثبوت پیش کرنا لازمی ہووے گا، ایس مقصد لئی 1979 توں پہلے دے تعلیمی اسناد، ڈومیسائل، پاسپورٹ یا دوجے سرکاری ریکارڈ نوں بنیادی شہادت قرار دِتا گیا اے۔
فیصلے وِچ کہیا گیا کہ جنہاں مقدمیاں وِچ مقررہ قانونی تقاضے پورے نہیں کیتے گئے، اوہناں وِچ فریقین نوں 30 دناں اندر ضروری دستاویزات جمع کران دی مہلت دِتی جاوے، بصورتِ دیگر ایسے دعوے خارج کر دِتے جان، ایہہ ہدایت مختلف عدالتاں وِچ زیر التوا سارے ایسے مقدمیاں تے وی لاگو ہووے گی۔ لاہور ہائیکورٹ نے مزید حکم دِتا کہ نادرا ویری فکیشن بورڈز شہریاں دیاں درخواستاں دا فیصلہ 60 دناں اندر کرن دے پابند ہون گے، عدالت نے وفاقی حکومت نوں نادرا آرڈیننس وِچ ترمیم کر کے شہریت نال متعلق مقدمیاں لئی خصوصی دائرہ اختیار دی شق شامل کرن دی وی سفارش کیتی۔
