چین نال معاہدیاں تے عملدرآمد لئی تعاون جاری رہے گا: وزیرِ اعظم

چین دے سفیر دی ملاقات، مشرقِ وسطیٰ، افغانستان، جنوبی ایشیا دی صورتحال تے گفتگو۔

اسلام آباد (دنیا نیوز) وزیرِ اعظم شہباز شریف نال پاکستان وِچ چین دے سفیر جیانگ زائی ڈونگ نے ملاقات کیتی، نائب وزیرِ اعظم و وزیرِ خارجہ اسحاق ڈار، وفاقی وزیرِ منصوبہ بندی احسن اقبال، وزیرِ اعظم دے مشیر ڈاکٹر سید توقیر شاہ وی ایس موقعے تے موجود سن۔ وزیرِ اعظم نے چین دے صدر شی جن پنگ تے وزیرِ اعظم لی چیانگ لئی نیک تمناواں دا اظہار کردے ہوئیاں پاکستان تے چین دے وچکار ہمہ جہت سٹریٹجک تعاون تے مبنی شراکت داری نوں ہور مضبوط بنان دے عزم دا اعادہ کیتا۔ وزیرِ اعظم نے کہیا کہ دونوں ملکاں دی قیادت دے وچکار طے پاون والے اہم فیصلیاں تے معاہدیاں تے عملدرآمد لئی تعاون جاری رکھیا جاوے گا۔

ملاقات دوران مشرقِ وسطیٰ، افغانستان تے جنوبی ایشیا سمیت خطے دی مجموعی صورتحال تے وی تبادلہء خیال کیتا گیا۔ چینی سفیر جیانگ زائی ڈونگ نے ایس موقعے تے کہیا کہ چین پاکستان نوں اپنا آہنی بھرا سمجھدا اے تے پاکستان دی سماجی تے معاشی ترقی دے فروغ لئی ہر ممکن تعاون جاری رکھیا جاوے گا۔