پاکستان خلاف اشتعال انگیز بیان بھارت دی مجبوری: خواجہ آصف

سفارتکاری ہمیشہ پہلا آپشن، بھارت نال ایس وقت بات چیت دا امکان نہیں، دکھ دی بات اے بھارت دے گندے کھیل وِچ افغانستان وی شامل ہو گیا: انٹرویو

اسلام آباد (مانیٹرنگ ڈیسک) وزیرِ دفاع خواجہ آصف نے کہیا اے کہ معرکہء حق وِچ شکست توں بعد بھارتی رہنماواں دی بیان بازی دی کوئی وقعت نہیں، جے بھارت نے کوئی ایڈونچر کرن دی کوشش کیتی تے پچھلے سال جیہڑی کسر رہ گئی سی اوہ وی پوری کر دیاں گے۔ ٹی وی نال گفتگو کردے ہوئیاں اوہناں نے بھارتی ہم منصب دے پاکستان تے آزاد کشمیر نال متعلق بیان نوں اوہناں دی سیاسی مجبوری قرار دے دِتا تے کہیا کہ طلبہ دی وڈی احتجاجی تحریک پاروں مودی حکومت شدید دباؤ وِچ اے، پاکستان خلاف اشتعال انگیز بیانات بھارت دی داخلی مجبوری اے۔ اوہناں نے کہیا کہ پاکستان بہادری نال بھارت دا مقابلہ کر رہیا اے، جے پاکستان نال مکمل جنگ لڑنا چاہندا اے تے اسیں تیار آں۔

وزیرِ دفاع نے کہیا کہ بھارت نال ایس وقت بات چیت دے امکانات دور دور تک نظر نہیں آؤندے، عزت آبرو نال معاملات طے ہون تے چنگی بات ہوندی اے، سفارتکاری ہمیشہ پہلا آپشن ہونی چاہی دی اے پر ایس وقت کوئی امکان نظر نہیں آؤندا۔ اوہناں نے کہیا کہ دکھ دی بات اے بھارت دے گندے کھیل وِچ افغانستان وی شامل ہو گیا اے۔