صوبہ سندھ نوں 20 سالاں وِچ موئنجودڑو بنا دِتا گیا: رانا سکندر

پیپلز پارٹی نے مقابلہ کرنا اے تے لٹریسی، کرائم ریٹ، منصوبیاں تے بات کرے، سندھ نوں دانش سکول، الیکٹرک بساں، مینارٹی کارڈز ورگے منصوبے نہیں مل سکے

لاہور (خبر نگار) صوبائی وزیرِ تعلیم رانا سکندر حیات نے کہیا اے کہ صوبہ سندھ نوں 20 سالاں وِچ موئنجودڑو دے کھنڈرات بنا دِتا گیا۔ پنجاب دے تعلیمی اداریاں وِچ سندھ سمیت ہور صوبیاں دے بچے وی تعلیم، سکالرشپ، لیپ ٹاپ ورگیاں سہولیات توں مستفید ہو رہے نیں۔ دانش سکولاں وِچ سندھ تے ہور صوبیاں دے 1800 بچے تعلیم حاصل کر رہے نیں۔ سکول آف ایمیننس وِچ سندھ دے 750 بچوں نے داخلہ لیا۔ سندھ دے پچھلے 2 سال دے اعداد و شمار کڈھے جان تے انرولمنٹ 9 فیصد توں زیادہ نہیں ودھی۔

ایہناں خیالات دا اظہار اوہناں نے پریس کانفرنس دوران میڈیا نمائندیاں دے مختلف سوالاں دے جواب دیندے ہوئیاں کیتا۔ اوہناں نے کہیا کہ پیپلز پارٹی نے پنجاب دا مقابلہ کرنا اے تے پرفارمنس نال کرے، لٹریسی ریٹ، کرائم ریٹ تے منصوبیاں تے بات کرے۔ جدوں وی پنجاب تے سندھ دی ترقی دا تقابلی جائزہ لیا جاوے تے پیپلز پارٹی دے ڈھڈ وِچ مروڑ اٹھنا شروع ہو جاندے نیں، پنجاب دی ترقی پیپلز پارٹی دی سیاسی موت اے۔ وزیرِ تعلیم نے کہیا کہ پنجاب وِچ ریکارڈ ریفارمز کیتیاں گئیاں۔ پیپلز پارٹی کول صرف نعرے نیں، اوہ اج تک سندھ نوں دانش سکول، الیکٹرک بساں، مینارٹی کارڈز، لیپ ٹاپ، سکالرشپ، کسان کارڈ، اپنا گھر ورگے منصوبے نہیں دے سکی۔