پٹرول 1 روپیا لٹر سستا، ڈیزل 3 روپے 37 پیسے مہنگا

ڈیزل دی قیمت 386 روپے 83 پیسے، پٹرول دی 334 روپے 18 پیسے لٹر ہو گئی؛ باب المندب وِچ پھنسے جہاز نکل آئے، قیمتوں وِچ بہتری آنا شروع ہو جاوے گی: علی پرویز

اسلام آباد (مانیٹرنگ ڈیسک) اوگرا نے اج لئی پٹرولیم مصنوعات دیاں نویاں قیمتوں دا اعلان کر دِتا، پٹرول دی فی لٹر قیمت وِچ 1 روپیا کمی جبکہ ڈیزل دی قیمت وِچ 3 روپے 37 پیسے لٹر اضافہ کر دِتا گیا اے، کمی توں بعد پٹرول دی نئی قیمت 334 روپے 18 پیسے فی لٹر جبکہ ڈیزل دی فی لٹر قیمت 386 روپے 83 پیسے ہو گئی اے۔ پٹرولیم ڈویژن نے 28 جولائی لئی پٹرول تے ڈیزل دیاں نویاں قیمتوں دا نوٹیفکیشن جاری کر دِتا اے۔

ادھر وفاقی وزیرِ پٹرولیم علی پرویز ملک نے چند دناں وِچ پٹرولیم مصنوعات دیاں قیمتوں وِچ بہتری دی امید ظاہر کر دِتی، اسلام آباد وِچ میڈیا نال گفتگو کردے ہوئیاں وزیرِ پٹرولیم نے کہیا کہ باب المندب وِچ پھنسے جہاز نکل آئے نیں، قیمتوں وِچ چند دناں توں جاری اضافہ بہتری ول جانا شروع ہووے گا، اوہناں نے کہیا کہ اوگرا نوں فارمولے دے تحت قیمتوں دا تعین کرنا ہوندا اے۔