مریم نواز دی کارکردگی توں مخالفین بوکھلاہٹ دا شکار : عظمیٰ
آزاد کشمیر دے عوام نے انتشار دی سیاست مسترد کر کے ووٹ نوں ترجیح دتی، الزامات دے بجاے کارکردگی وکھاؤ، لوک پنجاب ورگی ترقی چاہندے نیں
لاہور (سٹاف رپورٹر) وزیر اطلاعات و ثقافت پنجاب عظمیٰ بخاری نے آکھیا اے کہ مخالفین دے کول عوام نوں وکھان لئی کجھ نہیں، ایس لئی اوہ بے بنیاد الزامات تے منفی سیاست دا سہارا لے رہے نیں، آزاد کشمیر دے عوام نے انتشار دی سیاست مسترد کرکے ووٹ پاؤن نوں ترجیح دتی جدوں کہ پنجاب وچ وزیراعلیٰ مریم نواز دی قیادت وچ مون سون توں پہلاں کیتے گئے موثر انتظامات، جدید انفراسٹرکچر تے بروقت حکومتی اقدامات دی وجہ توں ریکارڈ بارشاں دے باوجود شہریاں نوں ریلیف ملیا، جنہاں دے کول کارکردگی وکھان لئی کجھ نہیں اوہ صرف الزامات لاندے نیں، مخالفین نوں چاہیدا اے کہ الزامات دی بجاے اپنی کارکردگی دی بنیاد اتے عوام توں ووٹ منگن۔
اینہاں خیالات دا اظہار اونہاں ڈی جی پی آر وچ پریس کانفرنس کردے ہوئے کیتا۔ اونہاں آکھیا کہ جیہڑے لوک دھاندلی دے خلاف بیانات دے رہے سن اوہو ہار دے ڈر توں خود دھاندلی اتے اتر آئے، آزاد کشمیر دے عوام وی اپنے علاقیاں وچ ستھرا پنجاب، الیکٹرک بساں، ہونہار سکالرشپ، لیپ ٹاپ سکیم تے دوجے منصوبے چاہندے نیں، بلکہ پورے پاکستان دے عوام پنجاب ورگی ترقی تے طرزِ حکمرانی دی خواہش رکھدے نیں۔ عظمیٰ بخاری نے آکھیا کہ میاں نواز شریف نوں کسے عہدے دی ضرورت نہیں، اوہ جیویں پنجاب دے معاملیاں وچ رہنمائی کر رہے نیں اویں ای آزاد کشمیر دے وزیراعظم دی وی سرپرستی کرن گے، اوہ تاں وزیراعظم دے وی وزیراعظم نیں. صحافیاں دے سوالات دے جواب وچ عظمیٰ بخاری نے آکھیا کہ مون سون، بارشاں تے چہلم حضرت امام حسینؑ دے موقع اتے تمام ضروری انتظامات مکمل کر لتے گئے نیں، پنجاب حکومت زائرین نوں ہر ممکن سہولت فراہم کرے گی تے واسا سمیت تمام متعلقہ ادارے پوری طرح متحرک رہن گے۔
