سینیٹ کمیٹی: مانع حمل اشیا دی خریداری، استعمال اتے بریفنگ طلب
بروقت آبادی سروے نہ ہون نال مؤثر منصوبہ بندی، پالیسی سازی، وسائل دی تقسیم متاثر، جاری ترقیاتی منصوبے مکمل کرکے ہی نوین منصوبے شروع کیتے جان، چیئرپرسن
اسلام آباد (اپنے رپورٹر توں) سینیٹ دی قائمہ کمیٹی برائے منصوبہ بندی، ترقی تے خصوصی اقدامات نے مانع حمل اشیا دی خریداری، تقسیم تے استعمال اتے خصوصی بریفنگ طلب کر لئی، کمیٹی دا اجلاس چیئرپرسن سینیٹر قرۃ العین مری دی زیر صدارت ہویا۔ چیئرپرسن سینیٹر قرۃ العین مری نے بروقت سروے نہ ہون اتے تشویش دا اظہار کردے ہوئے آکھیا کہ تازہ ترین آبادیاتی اعداد و شمار دی عدم دستیابی شواہد اتے مبنی منصوبہ بندی، مؤثر پالیسی سازی تے وسائل دی بہتر تقسیم وچ رکاوٹ بندی اے۔
بروقت آبادی سروے نہ ہون نال مؤثر منصوبہ بندی، پالیسی سازی، وسائل دی تقسیم متاثر ہوئی، چیئرپرسن کمیٹی نے ہدایت کیتی کہ جاری ترقیاتی منصوبے مکمل کرکے ہی نوین منصوبے شروع کیتے جان۔ وزارتِ قومی صحت نے بریفنگ وچ دسیا کہ منصوبے دی منظوری مئی ۲۰۲۱ وچ اک ارب ۹۹ کروڑ ۶۶ لکھ ۸۳ ہزار روپیہ دی لاگت نال دتی گئی سی۔ منصوبے وچ آزاد جموں و کشمیر، گلگت بلتستان تے اسلام آباد کیپٹل ٹیریٹری شامل نیں۔ چیئرپرسن نے ترقیاتی منصوبیاں وچ تاخیر اتے تشویش ظاہر کردے ہوئے ہدایت کیتی کہ زیرِ تکمیل منصوبے جلدی مکمل کیتے جان تے نوین منصوبیاں دے آغاز توں پہلاں جاری منصوبیاں دی تکمیل نوں ترجیح دتی جائے تاں جو عوامی وسائل دا مؤثر تے دانشمندانہ استعمال یقینی بنایا جا سکے.
