اٹارنی جنرل دے گھر چھاپا مارن تے ایس ایچ او سمیت 11 اہلکاراں دے خلاف پرچہ درج
منصور اعوان دے نال والے گھر وِچ مجرم بندیاں دے ہون دی سوں سی، اہلکار بھلیکھے نال اوہناں دے گھر وِچ وڑ گئے: پولیس
ایس ایچ او تھانا سرور روڈ عرفان سمیت 11 اہلکاراں نوں چارج شیٹ کر دِتا گیا، ایس ایچ او نے عبوری ضمانت وی کروا لئی
لہور (کرائم رپورٹر، مانیٹرنگ ڈیسک) اٹارنی جنرل آف پاکستان منصور اعوان دے گھر لہور کینٹ دے علاقے وِچ چھاپا مارن تے ایس ایچ او سمیت 11 اہلکاراں خلاف پرچہ (مقدمہ) درج کر لیا گیا۔ اٹارنی جنرل دے ڈرائیور عرفان نے دَسیا کہ پولیس نے چھاپا ماریا تاں صرف ملازم گھر تے سن، اہلکاراں نے گھر دے باہر رکھے گملے وی بھن دِتے، پولیس پارٹی جاندے ہوئے سی سی ٹی وی کیمریاں دا سسٹم وی نال لے گئی سی۔
سوں ملن تے اٹارنی جنرل میٹنگ توں فارغ ہو کے واپس گھر پہنچے تاں پولیس سی سی ٹی وی کیمریاں دی فوٹیج مٹا کے ڈی وی آر واپس کر گئی سی۔
پولیس دے مطابق ایس ایچ او تھانا سرور روڈ دی آگوائی وِچ پولیس پارٹی 27 جولائی دی شام 6 وجے جَنگلا (گیٹ) ٹپ کے اٹارنی جنرل منصور اعوان دے گھر وڑ گئی تے وہاں موجود ملازماں نوں ڈرایا دھمکایا۔ اٹارنی جنرل دے نال والے گھر وِچ مجرم بندیاں دی موجودگی دی سوں سی پر اہلکار بھلیکھے نال اٹارنی جنرل دے گھر وڑ گئے۔
پولیس نے سب انسپکٹر مشتاق دی مدعیت وِچ ایس ایچ او تھانا سرور روڈ عرفان سمیت 11 پولیس اہلکاراں خلاف پرچہ درج کر کے اوہناں نوں چارج شیٹ کر دِتا۔ ایف آئی آر دے مطابق پولیس نے چھاپا مار کے اپنے اختیارات توں ودھ کے کم کیتا۔
ترجمان کینٹ پولیس دے مطابق ایس ایچ او نے غلط گھر تے ریڈ کیتی، قانونی کارروائی جاری ہے۔
دوجے پاسے ایس ایچ او تھانا سرور روڈ نے عدالت توں عبوری ضمانت وی کروا لئی ہے۔
