افغاناں نوں پناہ یا روزگار دینا وی جرم، کارروائی ہوئے گی: سندھ پولیس

دہشت گردی دے خدشے موجود، سکیورٹی ادارے روکو تھام کر رہے نیں: ایڈیشنل آئی جی؛ سندھ وِچ دہشت گردی دے 8 واقعات، پچھلے سال 37 سن، تاجراں نال خطاب

کراچی (کامرس رپورٹر، مانیٹرنگ ڈیسک): ایڈیشنل آئی جی سندھ آزاد خان نے کہیا اے کہ افغاناں نوں پناہ دینا تے روزگار فراہم کرنا وی جرم اے، ایہوجہے لوکاں خلاف وی سخت کارروائی کیتی جائے گی، لہٰذا کوئی وی تاجر افغانیاں نوں روزگار تے تحفظ فراہم کرن توں پرہیز کرے۔ آزاد خان نے کراچی چیمبر آف کامرس اینڈ انڈسٹری دا دورہ کیتا، جِتھے صدر کراچی چیمبر ریحان حنیف، سینئر پولیس افسران تے تاجر برادری دے نمائندیاں نے شرکت کیتی۔ ایس موقعے تے خطاب کردیاں ہوئیاں ایڈیشنل آئی جی سندھ نے کہیا کہ دہشت گردی دے خدشے موجود نیں، پر قانون نافذ کرن والے ادارے ایہناں دی روکو تھام کر رہے نیں۔ سندھ پولیس تے ایجنسیاں چنگا کم کر رہیاں نیں۔

اوہناں نے کہیا کہ اپنے ملک تے شہر بارے ماڑی گل کردے آں تے باہر والا وی ایہنوں بھڑا سمجھدا اے، پورے سندھ وِچ ایس سال دہشت گردی دے 8 واقعات ہوئے جیہڑے پچھلے سال 37 سن۔ پچھلے چھ مہینیاں وِچ مجموعی طور تے سٹریٹ کرائم وِچ 15 فیصد کمی آئی اے جد کہ گاڑی کھوہن تے ڈکیتی دوران قتل دیاں وارداتاں وِچ سالانہ 30 فیصد کمی ریکارڈ کیتی گئی۔ اوہناں نے کہیا کہ ڈاکٹر آکاش دا کیس بہت جلدی حل کر لیا گیا۔ ایس سال 9 بھتہ خور مقابلے وِچ مارے گئے تے 61 گرفتار کیتے گئے۔ بھتہ خوراں دے باہرلے ملک مقیم 4 سرغنیاں خلاف ریڈ وارنٹ وی جاری کیتے گئے نیں۔