این ایچ اے منصوبے، بجٹ ونڈ دا اگلی بیٹھک وِچ جائزہ
قومی اہمیت دے منصوبیاں لئی فنڈز دی فراہمی دا طریقہ کار وی زیرِ غور آئے گا، سینیٹ کمیٹی؛ موٹروے وائرل ویڈیو تے افسر معطل، انکوائری جلد مکمل کر لئی جائے گی: آئی جی
اسلام آباد (نیوز رپورٹر): سینیٹ دی قائمہ کمیٹی برائے مواصلات نے نیشنل ہائی وے اتھارٹی (این ایچ اے) دے ترقیاتی منصوبیاں دی تکمیݪ لئی بجٹ دی ونڈ تے مالی وسائل دی کمی دا اگلی بیٹھک وِچ تفصیلی جائزہ لین دا فیصلہ کیتا اے۔ قومی اہمیت دے منصوبیاں لئی مالی وسائل تے فنڈز دی فراہمی دا طریقہ کار وی زیرِ غور آئے گا۔ چیئرمین سینیٹر پرویز رشید دی صدارت وِچ ہون والی بیٹھک وِچ دیس بھر وِچ سڑکاں دے بنیادی ڈھانچے، شاہراہواں دی حفاظت تے جاری ترقیاتی منصوبیاں تے غور کیتا گیا۔ چترال، بلوچستان، سی پیک نال تعلق رکھن والی شاہراہواں تے کراچی-بیلہ روڈ دے معاملات سوالاں دے محرکین دی غیر موجودگی پاروں التوا وِچ پا دِتے گئے۔ کمیٹی نے موٹروے تے اک جوڑے دی مبینہ غیر اخلاقی سرگرمی بارے وائرل ویڈیو دا وی جائزہ لیا۔
انسپکٹر جنرل موٹروے پولیس نے دَسیا کہ واقعہ 16 جولائی نوں پیش آیا سی۔ اوہناں نے واضح کیتا کہ موٹروے پولیس دے ضابطہ کار وِچ ’’مورل پولیسنگ‘‘ شامل نہیں۔ واقعے وِچ ملوث افسر نوں معطل کر دِتا گیا اے تے انکوائری جلد مکمل کر لئی جائے گی۔ بیٹھک وِچ قومی شاہراہواں دے منصوبیاں وِچ تاخیر تے وی تشویش دا اظہار کیتا گیا۔ وزارتِ مواصلات دے ایڈیشنل سیکرٹری نے دَسیا کہ ایس سال کوئی نواں منصوبہ شروع نہیں کیتا گیا۔ کمیٹی نوں دَسیا گیا کہ 298 کلومیٹر لمبی کچلاک-ژوب (این-50) شاہراہ دا منصوبہ فنڈز دی کمی پاروں ہلے تک مکمل نہیں ہو سکیا۔ کمیٹی نے این ایچ اے منصوبیاں لئی فنڈز دی ویلے سر فراہمی تے مالی معاونت دے طریقہ کار دا وکھرا جائزہ لین دا فیصلہ کیتا۔
