آئینی عدالت دا امن و امان حکمنامے وِچ وادھے توں انکار
عدالت دا حکمنامہ اج تک محدود تھا تے نہ ہی وادھے دی لوڑ: جسٹس امین الدین
اسلام آباد (کورٹ رپورٹر): وفاقی آئینی عدالت دے چیف جسٹس امین الدین خان دی سربراہی وِچ تن رکنی بینچ نے بانی پی ٹی آئی دی مبینہ رہائی فورس بارے وزیراعلیٰ خیبر پختونخوا سہیل آفریدی، سلمان اکرم راجہ تے دوجیاں خلاف دائر آئینی درخواست دی سماعت کیتی۔ سماعت دوران علی بخاری نے وکالت نامہ تے جواب جمع کروان لئی ویلا منگیا تے مؤقف اختیار کیتا کہ اوہ مقدمے وِچ سہیل آفریدی دی نمائندگی کر رہے نیں، سویرے ہی دسیا گیا کہ سلمان راجہ دی وکالت وی کرنی اے۔ ایڈووکیٹ جنرل خیبر پختونخوا نے کہیا کہ ایہہ اک سیاسی قسم دا مقدمہ اے، پارٹی سیکرٹری جنرل نوں جواب جمع کروان لئی ویلا دِتا جائے۔ آئینی درخواست وِچ خدشہ جتایا گیا کہ وزیراعلیٰ خیبر پختونخوا اک نجی ملیشیا بنا رہے نیں۔
وکیل درخواست گزار نے استدعا کیتی کہ عدالت امن و امان دی صورتحال خراب نہ کرن دے اپنے پرانے حکمنامے وِچ وادھا کرے۔ چیف جسٹس نے ریمارکس دِتے کہ اوہ ایہوجہا نہیں کرن گے، عدالت دا حکمنامہ صرف اج دی تاریخ تک محدود نہیں سی ایس لئی وادھے دی لوڑ نہیں۔ اوہدر عدالت نے 9 مئی دے مقدمے خیبر پختونخوا توں واپس لین دے فیصلے خلاف دائر درخواست دی سماعت کردیاں ہوئیاں فریقاں نوں جواب جمع کروان لئی دو ہفتیاں دا ویلا دے دِتا۔ ایڈووکیٹ جنرل خیبر پختونخوا نے دَسیا کہ حکومت نوں درخواست تے کچھ اعتراضات نیں۔ درخواست گزار سِدھا آئینی عدالت نال رجوع نہیں کر سکدا۔ چیف جسٹس نے ریمارکس دِتے کہ جیہڑا جواب جمع کروانا چاہندا اے کروا دے۔ عدالت نے دوہاں درخواستاں دی سماعت گرمیاں دیاں عدالتی چھٹیاں توں بعد تک ملتوی کر دِتی۔
