بی آرٹی یلو لائن منصوبہ: پروجیکٹ ڈائریکٹر نوں ضمانت نہ ملی، سماعت ملتوی

کراچی (سٹاف رپورٹر): سندھ ہائیکورٹ نے بی آر ٹی یلو لائن منصوبے وِچ مبینہ کرپشن دے مقدمے وِچ سابق پراجیکٹ ڈائریکٹر ضمیر عباسی دی درخواستِ ضمانت تے سماعت 4 اگست تک ملتوی کر دِتی۔

درخواستِ ضمانت دی سماعت سندھ ہائیکورٹ دے جسٹس میراں محمد شاہ نے کیتی۔ سماعت دوران جسٹس میراں محمد شاہ نے کہیا کہ چھٹیاں دے آخری دہاڑے نیں، سانوں کیس صرف سننا ہی نہیں پیندا، لکھنا وی پیندا اے۔ درخواست گزار دے وکیل نے مؤقف اختیار کیتا کہ سابق پراجیکٹ ڈائریکٹر ضمیر عباسی خلاف کوئی ثبوت موجود نہیں، اوہناں نے قومی خزانے نوں کوئی نقصان نہیں پہنچایا۔ ضمیر عباسی خلاف مقدمہ انتظامی انکوائری دی بنیاد تے قائم کیتا گیا۔

وکیلِ صفائی مطابق صوبائی اینٹی کرپشن عدالت نے متنازع معاہدے تے تکنیکی معاملیاں تے حتمی رائے قائم کیتی اے۔ تفتیش مکمل ہون توں بعد ملزم دی مزید جسمانی تحویل دی وی لوڑ نہیں اے۔ وکیل نے استدعا کیتی کہ ضمیر عباسی دی درخواستِ ضمانت منظور کیتی جائے۔ عدالت نے دلائل سنن توں بعد مزید سماعت 4 اگست تک ملتوی کر دِتی۔