مومنہ اقبال ہراسمنٹ کیس: وکیلاں نوں اگلی سماعت تے حتمی دلائل لئی طلب کر لیا گیا

ملزم ثاقب چدھڑ تفتیش وِچ قصوروار پایا گیا، گھر والی دا موبائل فرانزک لئی بھجوا دِتا: تفتیشی افسر؛ ایڈیشنل سیشن جج نے لیگی ایم پی اے تے اوہناں دی گھر والی دی عبوری ضمانت وِچ 3 ستمبر تک وادھا کر دِتا

لاہور (کورٹ رپورٹر): ایڈیشنل سیشن جج نصرت صدیقی نے اداکارہ مومنہ اقبال نوں ہراساں کرن تے دھمکیاں دین دے کیس وِچ مسلم لیگ (ن) دے ایم پی اے ثاقب چدھڑ تے اوہناں دی گھر والی سمیرا دی عبوری ضمانت وِچ 3 ستمبر تک وادھا کر دِتا، عدالت نے وکیلاں نوں اگلی سماعت تے حتمی دلائل لئی طلب کر لیا۔

سماعت دوران تفتیشی افسر نے مؤقف اپنایا کہ ملزم ثاقب چدھڑ دی حد تک تفتیش مکمل ہو چکی اے، اوہ تفتیش وِچ قصوروار پایا گیا اے، ملزم دی گھر والی سمیرا نے دو دن پہلاں اپنا موبائل فون این سی سی آئی اے وِچ جمع کروایا، جیہنوں فرانزک لئی بھجوا دِتا گیا اے۔ مومنہ اقبال دے وکیل عدنان احسان نے استدعا کیتی کہ ملزماں دی آزادی خطرے دا باعث اے ایس لئی اوہناں دی ضمانت خارج کیتی جائے۔