خرم آغا دی تھاں احمد رضا سرور نوں سیکرٹری داخلہ بناؤن دی منظوری
وفاقی حکومت نے خرم آغا نوں بدلن دا حکم دے دِتا، جلد نوٹیفکیشن دا امکان؛ پنجاب دے ایڈیشنل چیف سیکرٹری احمد رضا نوں انتظامی معاملیاں دا وڈا تجربہ حاصل
لاہور وفاقی حکومت نے وزارتِ داخلہ وِچ اہم انتظامی تبدیلی دا فیصلہ کردیاں ہوئیاں وفاقی سیکرٹری داخلہ خرم آغا نوں بدلن دا حکم دے دِتا۔ ذرائع مطابق پنجاب دے ایڈیشنل چیف سیکرٹری احمد رضا سرور نوں نواں وفاقی سیکرٹری داخلہ تعیناٹ کرن دی منظوری دے دِتی گئی اے، ایس حوالے نال باقاعدہ نوٹیفکیشن جلد جاری کیتے جان دا امکان اے۔ وفاقی حکومت ولوں پنجاب حکومت نال رابطہ کیتا گیا تے احمد رضا سرور دیاں خدمات واپس وفاق وِچ منگیاں، جیہدے تے پنجاب حکومت نے خدمات وفاق دے سپرد کرن دی اجازت دِتی۔
ذرائع دا کہنا سی ایہہ تبدیلی وفاقی بیوروکریسی وِچ اعلیٰ سطح دے تبادلیاں دا حصہ اے جد کہ احمد رضا سرور نوں انتظامی معاملیاں دا وڈا تجربہ حاصل اے، اوہناں دی تعیناٹی نال وزارتِ داخلہ دے انتظامی معاملیاں وِچ ہور بہتری دی آس کیتی جا رہی اے۔ واضح رہے خرم آغا بطور وفاقی سیکرٹری داخلہ اپنی ذمہ داریاں نبھا رہے سن، پر حکومت نے انتظامی لوڑاں نوں مدِ نظر رکھدیاں ہوئیاں اوہناں نوں بدلن دا فیصلہ کیتا اے۔ دوجے پاسے خرم آغا دی اگلی تعیناٹی بارے وی مشاورت جاری اے پر ایس حوالے نال ہلے کوئی باضابطہ احکامات سامنے نہیں آئے۔
