کراچی بندرگاہ تے دنیا دے وڈے کنٹینر بردار جہاز دی کامیاب ہینڈلنگ
کراچی (کامرس رپورٹر): کراچی پورٹ تے دنیا دے وڈے کنٹینر بردار جہازاں وِچ شمار ہون والے ایم ایس سی مرجام دی کامیاب ہینڈلنگ کیتی گئی، جیہنوں ملکی بندرگاہی شعبے لئی اک اہم پیشرفت قرار دِتا جا رہا اے۔
کراچی پورٹ ٹرسٹ مطابق 400 میٹر لمبّے تے 58.8 میٹر چوڑیے ایس میگا کنٹینر جہاز نے 27 جولائی نوں سویرے 11 وجے کراچی پورٹ وِچ داخل ہو کے ساؤتھ ایشیا پاکستان ٹرمینلز تے کامیابی نال برتھ کیتا، ایم ایس سی مرجام دی مجموعی گنجائش 19 ہزار 500 ٹی ای یوز اے جد کہ ایس دا ڈرافٹ 14.2 میٹر اے، جیہڑا ایہنوں دنیا دے وڈے کنٹینر بردار جہازاں وِچ شامل کردا اے۔
انتظامیہ دا کہنا اے کہ جہاز توں تقریباً 1,500 کنٹینراں دی لوڈنگ تے ان لوڈنگ کیتی جائے گی جیہدے لئی پورٹ تے سارے آپریشنز جدید سہولتاں تے مربوط انتظاماں تحت انجام دِتے جا رہے نیں۔ انتظامیہ مطابق کراچی پورٹ تے کارگو آپریشن مکمل ہون توں بعد ایم ایس سی مرجام اپنا اگلا سفر عمان دی بندرگاہ سلالہ ول کرے گا۔
حکام دا کہنا اے کہ ایس قسم دے میگا کنٹینر جہازاں دی آمد کراچی پورٹ دی ودھدی ہوئی استعداد، جدید انفراسٹرکچر تے بین الاقوامی شپنگ لائنز دے اعتماد دا مظہر اے جیہدے نال پاکستان دی سمندری تجارت تے لاجسٹکس سرگرمیاں نوں ہور فروغ ملن دی آس اے۔
