فیروز والا تے ہور ہڑ متاثرہ علاقیاں وِچ صورتحال ہور سنگین، لوکاں دی نقل مکانی جاری
رچنا ٹاؤن تے ہور علاقیاں وِچ کئی فٹ پانی، پٹھان کالونی وِچ چار دناں توں بجلی بند، سرکاری امداد نہیں آئی: متاثرین؛ جلالپور پیروالا وِچ ہور بستیاں زیرِ آب، ڈُب کے شہری جاں بحق، پنجاب وِچ اج توں بارشاں دا نواں طاقتور سپیل شروع
لاہور، جلالپور پیروالا، اسلام آباد (مانیٹرنگ ڈیسک، سٹاف رپورٹر توں، نامہ نگار، دنیا نیوز): شیخوپورہ دی تحصیل فیروزوالا تے دریائے راوی کنارے واقع متعدد پنڈاں وِچ سیلابی صورتحال ہور سنگین ہو گئی، برساتی نالے دا بند ٹٹن نال فیروزوالا دی پٹھان کالونی دا مین لاہور جی ٹی روڈ نالوں زمینی رابطہ ٹٹ گیا، سَینکرڑے ٹبر محصور ہو کے رہ گئے، متاثرہ علاقیاں توں لوکاں دی محفوظ تھانواں ول نقل مکانی جاری اے۔ دوجے پاسے ملتان دی تحصیل جلالپور پیروالا وِچ دریائے چناب وِچ سیلاب نال ہور کئی بستیاں پانی وِچ گھیر گیاں جد کہ سیلابی پانی وِچ ڈُب کے 55 ورھیاں دا بندہ جاں بحق ہو گیا۔
تفصیلات مطابق سیلاب زدہ علاقیاں رچنا ٹاؤن، رانا ٹاؤن، پٹھان کالونی، کوٹ عبدالمالک، کالا شاہ کاکو دے نواحی علاقیاں مراد پور، جامکے چیمہ وِچ کئی کئی فٹ پانی جمع اے۔ مقامی لوکاں مطابق حفاظتی بند ٹٹن یا برساتی پانی دے اوور فلو پاروں مختلف آبادیاں وِچ پانی داخل ہویا تے متعدد پنڈ زیرِ آب آ گئے۔ کئی ٹبراں نے سوانیاں، بالاں تے بزرگاں نوں محفوظ تھانواں تے منتقل کر دِتا جد کہ بعض گھراں وِچ جنے سامان دی حفاظت لئی موجود نیں۔ پٹھان کالونی دے رہائشی محمد ریاض نے بتایا کہ علاقے وِچ پچھلے چار دناں توں بجلی بند اے، پانی دی سطح مسلسل اُچی ہو رہی اے۔
متاثرہ خاتون رشیداں بی بی نے بتایا کہ اوہناں دے گھر دا بہتا سامان پانی وِچ تباہ ہو گیا، عمر بھر دی جمع پونجی ضائع ہو چکی اے تے اوہناں نوں کوئی سرکاری امداد نظر نہیں آ رہی۔ رچنا ٹاؤن دے رہائشی محمد سلیم مطابق کئی دن لنگھن دے باوجود پانی دی سطح گھٹ نہیں ہو رہی، معمولاتِ زندگی مکمل طور تے مفلوج نیں تے لوکاں نوں خوراک تے پین دے صاف پانی دی فراہمی وِچ اوکڑاں دا سامنا اے۔
ایس دوران متاثرہ علاقیاں وِچ پاکستان مرکزی مسلم لیگ دے شعبہ خدمتِ خلق، الخدمت فاؤنڈیشن تے ریسکیو 1122 دیاں ٹیماں امدادی سرگرمیاں وِچ مصروف نیں تے متاثرین نوں محفوظ تھانواں تے منتقل کر رہیاں نیں۔ متاثرہ علاقے دے وسنیکاں مطابق ہلے تک کوئی اعلیٰ حکومتی یا انتظامی نمائندہ متاثرہ آبادیاں وِچ نہیں پہنچیا، جد کہ امدادی سرگرمیاں دا وڈا بوجھ فلاحی تنظیماں تے ریسکیو اداریاں تے اے۔
اِدھر دریائے چناب وِچ سیلاب نال ملتان دی تحصیل جلالپور پیروالا وِچ وی ہور کئی بستیاں پانی وِچ گھیر گیاں تے سیلابی پانی ہائی سکول لاڑ جنوبی وِچ وی داخل ہون نال اوہدی کندھ ڈگ گئی، نچلے درجے دے سیلاب پاروں وچھہ سندیلہ، نڑول، بیٹ کیچ جنوبی، بیٹ مغل دیاں کئی بستیوں دے زمینی راستے ٹٹ گئے نیں، علاقے دے لوکاں نے نقل مکانی شروع کر دِتی جد کہ بیٹ مغل وِچ سیلابی پانی وِچ ڈُب کے 55 ورھیاں دا رب نواز نامی بندہ جاں بحق ہو گیا۔
سیلاب نال سَینکرڑے ایکڑ تے تیار فصلاں وی شدید متاثر ہوئیاں نیں۔ اِدھر محکمہ موسمیات نے پورے ملک وِچ 29 جولائی توں بارشاں دے نئے طاقتور سلسلے دے داخل ہون دی پیشگوئی کردیاں ہوئیاں متعلقہ اداریاں نوں الرٹ رہن دی ہدایت جاری کر دِتی۔ محکمہ موسمیات مطابق یکم اگست توں لوہدیاں ہواواں (مغربی ہواواں) دا اک مضبوط سلسلہ ملک دے بہتے حصیاں نوں اپنی لپیٹ وِچ لے سکدا اے۔ اسلام آباد، راولپنڈی، مری، گلیات تے پنجاب دے بہتے اضلاع وِچ اج 29 جولائی توں 4 اگست تک، پختونخوا، آزاد جموں و کشمیر، گلگت بلتستان وِچ 5 اگست تک تیز ہواواں تے گرج چمک نال موسلا دھار بارش دا امکان اے۔ خیبر پختونخوا دے بہتے اضلاع وِچ 29 جولائی توں 5 اگست تک تیز ہواواں، گرج چمک تے بعض تھانواں تے شدید بارش متوقع اے۔
بلوچستان تے سندھ وِچ 31 جولائی دی شام تے رات توں 3 اگست تک بعض تھانواں تے بارش دا امکان اے، جد کہ سندھ دے مختلف اضلاع وِچ 31 جولائی دی شام توں 2 اگست تک گرج چمک نال بارش دی پیشگوئی کیتی گئی اے۔
محکمہ موسمیات نے خبردار کیتا اے کہ لاہور، اسلام آباد، راولپنڈی، پشاور، نوشہرہ، گوجرانوالہ، گجرات، سیالکوٹ، ملتان تے فیصل آباد وِچ 30 جولائی توں 4 اگست تک اربن فلڈنگ تے پہاڑی علاقیاں وِچ لینڈ سلائیڈنگ دا خطرہ اے۔ صوبائی ڈیزاسٹر مینجمنٹ اتھارٹی پنجاب مطابق دریائے سندھ وِچ کالاباغ تے تونسہ دے مقام تے ہلے وی نچلے درجے دا سیلاب موجود اے، دریائے چناب وِچ سیلابی صورتحال وِچ مسلسل بہتری آ رہی اے، دریائے ستلج تے جہلم وِچ وی پانی دا بہاؤ معمول مطابق اے پر دریائے راوی وِچ بلوکی تے سدھنائی دے مقام تے نچلے درجے، وزیرآباد نالہ پلکھو وِچ اونچے درجے دا سیلاب برقرار اے۔
اِدھر پنجاب دے متعدد اضلاع وِچ بارشاں دی پیشگوئی نوں مدِ نظر رکھدیاں ہوئیاں سیکرٹری ہاؤسنگ پنجاب نورالامین مینگل نے تمام واسا ایجنسیوں نوں ہائی الرٹ رہن دی ہدایت جاری کر دِتی۔ اوہناں نے بارشاں دوران کسی وی ہنگامی صورتحال نال نپٹن لئی مکمل تیاری تے فوری رسپانس یقینی بناؤن دی ہدایت کیتی اے۔
