بلوچستان: ڈی ایس پی بارکھان فائرنگ وِچ شہید، کیچ توں 6 مزدور اغوا، اک قتل
تربت جاندیاں 4 پنجابی، 3 پختون مزدوراں نوں اغوا کیتا گیا، صوابی دے رہائشی جاوید دی گولیاں نال چھلنی لاش ملی؛ کھنہ چوکی نیڑھے پولیس گاڑی تے گولیاں چلائیاں گئیاں، اک اہلکار زخمی، علاقے نوں گھیر کے سرچ آپریشن
تربت، کوئٹہ (نامہ نگار، سٹاف رپورٹر، مانیٹرنگ ڈیسک): بلوچستان دے ضلع بارکھان وِچ پولیس دی گاڑی تے فائرنگ دے نتیجے وِچ ڈی ایس پی بارکھان مرید بگٹی شہید ہو گئے، جد کہ اک پولیس اہلکار زخمی ہو گیا، دوجے پاسے کیچ توں 6 مزدور اغوا تے اک نوں قتل کر دِتا گیا۔
پولیس مطابق ڈی ایس پی دی گاڑی تے فائرنگ دا واقعہ کھنہ چوکی نیڑھے پیش آیا، واقعے توں بعد پولیس تے ہور قانون نافذ کرن والے اداریاں نے علاقے نوں گھیرے وِچ لے کے ملزماں دی تلاش شروع کر دِتی۔ حکام دا کہنا اے کہ حملے دی تحقیقات جاری نیں جد کہ واقعے وِچ ملوث بندیاں دا تعین کیتا جا رہا اے۔
اِدھر ضلع کیچ دے علاقے کلاتک وِچ نامعلوم مسلح بندیاں ولوں مرکزی شاہراہ توں 7 مزدوراں نوں اغوا کر لیا گیا، فائرنگ نال اک راہگیر تے مغوی جاں بحق ہو گئے۔
پولیس مطابق کیچ وِچ کلاتک وِچ مزدوری توں بعد تربت واپس جان والے ست مزدوراں نوں نامعلوم مسلح بندے شناخت توں بعد اپنے نال لے گئے، مغویاں وِچ چار پنجابی تے تِن پختون شامل نیں۔ بعد وِچ سورگ دے مقام توں اک پختون مزدور جاوید (رہائشی صوابی) دی گولیاں نال چھلنی لاش برآمد ہو گئی جد کہ پنجاب دے چار رہائشی تے دو پختون مزدور ہلے تک لاپتا نیں۔ واقعے دوران فائرنگ دی زد وِچ آ کے سولبند دا رہائشی مقامی راہگیر عبدالرزاق ولد داد محمد وی جاں بحق ہو گیا، جیہدی لاش ضروری کارروائی توں بعد وارثاں دے حوالے کر دِتی گئی۔
پولیس تے ہور قانون نافذ کرن والے اداریاں نے علاقے وِچ سرچ آپریشن شروع کر دِتا اے، پر لاپتا چھ مزدوراں دا ہلے تک کوئی سراغ نہیں ملیا۔
