چھوٹے دکانداراں لئی خاص ٹیکس طریقہ کار متعارف

20 کروڑ تک کاروبار کرن والے دکاندار سکیم توں فائدہ چک سکیں گے؛ سکیم اختیار کرن والے دکانداراں دا عمومی طور تے آڈٹ نہیں ہوئے گا

اسلام آباد (دنیا نیوز): فیڈرل بورڈ آف ریونیو (ایف بی آر) نے چھوٹے دکانداراں لئی خاص ٹیکس طریقہ کار دا نوٹیفکیشن جاری کر دِتا۔

ایف بی آر ولوں جاری نوٹیفکیشن مطابق سالانہ 20 کروڑ روپے تک کاروبار کرن والے انفرادی دکاندار سکیم توں فائدہ چک سکیں گے، خاص طریقہ کار صرف ٹیکس سال 2026 لئی نافذ ہوئے گا جد کہ سکیم تحت کل کاروبار تے اک فیصد ٹیکس ادا کرنا ہوئے گا، ریٹرن نال گھٹو گھٹ 25 ہزار روپے نقد ٹیکس ادا کرنا لازمی قرار دِتا گیا اے جد کہ ودہولڈنگ ٹیکس قابلِ ادائیگی ٹیکس توں منہا کیتا جا سکے گا تے وادھو رقم واپس نہیں ہوئے گی۔

ایف بی آر مطابق اہل دکاندار آئی آر آئی ایس (IRIS) پورٹل، موبائل ایپ یا ٹیکس دفتر راہیں رجسٹریشن کرا سکیں گے، سکیم اختیار کرن والے دکانداراں دا عمومی طور تے آڈٹ نہیں ہوئے گا۔ نوٹیفکیشن مطابق غیر معمولی لین دین یا غلط استعمال دی صورت وِچ محکمانہ کارروائی کیتی جا سکے گی جد کہ اہل دکانداراں نوں پی او ایس (POS) سسٹم تے ڈیجیٹل انوائسنگ توں استثنیٰ حاصل ہوئے گا۔

ایف بی آر دا کہنا اے کہ مقررہ تاریخ تک ریٹرن یا سکیم دا انتخاب نہ کرن تے 10 ہزار توں 50 ہزار روپے تک جرمانہ ہوئے گا۔