پاکستان پوسٹ نوں منافع بخش بناؤن لئی 14 نکاتی اصلاحاتی پلان
3 سالہ بزنس پلان، ای کامرس توسیع، ڈیجیٹل ٹرانسفارمیشن، فیٹف سیل فعال ہوئے گا؛ رائٹ سائزنگ، آڈٹ پیراز خاتمہ، عدالتی کیسز تے محکمانہ تحقیقات جلد نمٹاؤن دی ہدایت
اسلام آباد (ایس ایم زمان): وزارتِ مواصلات نے پاکستان پوسٹ آفس دی ری سٹرکچرنگ، گھاٹے دے خاتمے، ادارے نوں منافع بخش بناؤن تے تجارتی و مالیاتی بحالی لئی 14 نکاتی اصلاحاتی پلان جاری کر دِتا۔
اصلاحاتی منصوبے تحت پاکستان پوسٹ نوں کمرشل ٹرانزیشن تے اسٹیٹ اونڈ انٹرپرائز قانوناں مطابق چلاؤن، تِن سالہ سٹریٹجک بزنس پلان تے عمل، بین الاقوامی مالیاتی تقاضے پورے کرن، ایف اے ٹی ایف (FATF) سیل فعال بناؤن، عالمی ادارے وائے ٹی او (YTO) نال جوائنٹ وینچر، ای کامرس دے فروغ تے بین الاقوامی لاجسٹکس دی توسیع دی ہدایت کیتی گئی اے۔
منصوبے وِچ بزنس سٹریٹجی، ایڈوائزری سروسز، ڈیجیٹل ٹرانسفارمیشن، کسٹمز نال ڈیجیٹل انٹیگریشن، پارسل تے ترسیلاتی نظام دی بہتری، ایچ آر ایم ڈیٹا بینک، کارکردگی جانچن دے اشاریے، رائٹ سائزنگ تے ہیومن ریسورس ریشنلائزیشن وی شامل نیں۔
وزارتِ مواصلات نے مالیاتی شفافیت لئی آڈٹ پیراز نمٹاؤن، زیرِ التوا محکمانہ تحقیقات جلد مکمل کرن، وزارتِ قانون دا ڈیش بورڈ اپ ڈیٹ رکھن، عدالتی مقدمیاں دی موثر پیروی تے جلد نمٹاؤن دی وی ہدایت کیتی اے۔
وزارت نے پاکستان پوسٹ نوں 14 نکاتی اصلاحاتی منصوبے تے عمل درآمد کردیاں ہوئیاں مرحلہ وار پیش رفت رپورٹ جمع کراؤن دی ہدایت وی جاری کیتی اے۔
