ایف بی آر ٹیکس چوراں خلاف قانونی کارروائی کرے: وزیرِ اعظم

چینی دے پیداواری شعبے، ایف بی آر دے اعداد و شمار وِچ ہم آہنگی فعال ٹریکنگ نظام دا واضح ثبوت: اجلاس نال خطاب | دانش اتھارٹی بورڈ دا پہلا اجلاس، رولز دی منظوری، الاٹ زمین دانش سکول اتھارٹی دے ناں ٹرانسفر | رانا مشہود دی ملاقات

اسلام آباد (نامہ نگار) وزیراعظم شہباز شریف نے کیہا ہے کہ پاکستان دی تاریخ وِچ پہلی وار چینی دے پیداواری شعبے تے ایف بی آر دے اعداد و شمار وِچ ہم آہنگی ایس گل دا واضح ثبوت ہے کہ ایف بی آر دا لایا گیا ٹریکنگ نظام فعال تے بہتر کارکردگی وکھا رہیا ہے، ایس سلسلے وِچ چیئرمین ایف بی آر تے اوہناں دی ٹیم دیاں کوشساں سراہن جوگ (لائق تحسین) نے۔

ایف بی آر اصلاحات تے ہفتہ وار جائزہ اجلاس دی صدارت کردے ہوئے وزیراعظم نے ہدایت کیتی کہ وکھ وکھ شعبیاں وِچ ٹیکس دی صلاحیت (استعداد) دے اندازے لئی جامع تے سائنسی طریقہ کار بنا کے پیش کیتا جاوے، پاور سیکٹر نال تعاون نال غیر رسمی معاشی سرگرمیاں تے ٹیکس چوری وِچ ملوث بندیاں تے کارباراں دا پتا لا کے اوہناں خلاف قانونی کارروائی کیتی جاوے۔ وزیراعظم نے کیہا کہ ٹیکس نظام وِچ رہندے ہوئے ضابطیاں دی پابندی کرن والے تے ٹیکس جمع کرواؤن والے بندے تے کاروبار ملک و قوم دا قیمتی سرمایہ تے لائقِ تحسین نے، حکومت نے ٹیکس دے حوالے نال برآمدی تے مقامی شعبے نوں جنی ہو سکی سہولت دِتی ہے تے اَگے وی دیندی رہے گی۔

وزیراعظم نے ہدایت کیتی کہ ٹیکسٹائل، شربتاں (مشروبات)، سٹیل، پولٹری، کھان والے تیل تے گھیؤ، تے ٹائراں دے شعبیاں وِچ پیداوار دی ڈیجیٹل نگرانی دا نظام دسمبر تک فعال بنایا جاوے۔ اجلاس نوں بریفنگ وِچ دَسیا گیا کہ چینی، سیمنٹ، تمباکو، ٹائلز تے کھاد دے شعبے وِچ ٹریکنگ سسٹم پوری طرحاں فعال ہے جبکہ ہور 5 شعبیاں وِچ لاگو کرن دا کم آخری مراحل وِچ ہے جِس دی ٹیکس صلاحیت 7 سو ارب روپے توں ودھ ہے۔ وزیرِ اعظم نے ہدایت کیتی کہ پیداواری شعبے وِچ بالواسطہ ٹیکس اکٹھا کرن لئی ٹریکنگ نظام نوں ایسے ورھے (سال) دے انت تک یقینی بنایا جاوے۔

ایس دوران دانش اتھارٹی بورڈ دے پہلے اجلاس دی صدارت کردے ہوئے وزیراعظم نے کیہا کہ معاشی طور تے کمزور بالاں (بچوں) نوں اکو جہی تعلیم تے ترقی دے موقعے دینا حکومت دی پہلی ترجیح ہے۔ وزیرِ اعظم نے کیہا کہ بورڈ ممبران تے شرکاء دا ایس اہم ذمہ داری نوں قبول کرن تے دلی طور تے مشکور ہاں۔ اوہناں ہدایت کیتی کہ سارے زیرِ تعمیر دانش سکولاں نوں متوقع ویلے وِچ پورا کیتا جاوے، منڈیاں تے کڑیاں (طلبا و طالبات) لئی 100 فیصد بورڈنگ دی سہولت دِتی جاوے۔ اجلاس نے دانش سکول اتھارٹی رولز، منیجنگ ڈائریکٹر رولز تے دوجے قواعد دی اصولی منظوری دِتی، دانش سکولاں نوں الاٹ کیتی گئی ساری زمین دانش سکول اتھارٹی دے ناں ٹرانسفر کرن دی وی منظوری دے دِتی گئی۔

وزیراعظم نال چیئرمین وزیراعظم یوتھ پروگرام رانا مشہود احمد خان نے ملاقات کیتی تے وزیراعظم نوں یوتھ پروگرام دے تحت جاری منصوبیاں تے پیشرفت توں خبردار (آگاہ) کیتا۔ وزیراعظم نے ہدایت کیتی کہ یوتھ پروگرام دے منصوبیاں دے تحت روزگار دے موقعیاں لئی موثر تے جامع حکمتِ عملی تے بھرپور انداز وِچ کم کیتا جاوے، نوجواناں لئی بہترین تعلیم تے پیشہ ورانہ تربیت دا انتظام حکومت دیاں پہلی ترجیحاں وِچ شامل ہے۔

ایس توں علاوہ انسانی سمگلنگ خلاف عالمی دن تے اپنے پیغام وِچ اوہناں کیہا کہ پاکستان تے دنیا بھر وِچ انسانی سمگلنگ خلاف عالمی دن ایس عزم نال منایا جا رہیا ہے کہ ایس عالمی جرم دے خاتمے لئی سانجھیاں کوشساں پکے عزم نال جاری رکھیاں جان گئیاں، ایس عالمی دن تے میں ہر پاکستانی توں اپیل کردا ہاں کہ انسانی سمگلنگ وِچ شامل بندیاں دی نشاندہی وِچ ہوشیاری (مستعدی) دا مظاہرہ کرن تے محروم طبقات تے دھیان رکھن تاکہ اوہ استحصالی عناصر دے ہتھوں استعمال نہ ہون۔