حکومت دا پہلی وار 4 سالا حج پالیسی دا اعلان، خرچے 12 توں 13 لَکھ تجویز
10 فیصد ادائیگی تے ابتدائی درخواست، ڈیجیٹل مانیٹرنگ، شکانتاں دا ترت ازالہ، کوٹہ بدستور 60 تے 40 فیصد: ایہ صرف پالیسی ای نہیں بنیادی دیرپا اصلاحات دا آغاز، حاجیوں نوں عالمی معیار دیاں سہولتاں ملن گئیاں: سردار یوسف
اسلام آباد (سید قیصر شاہ) وفاقی حکومت نے پہلی وار آؤن والے چار سالاں لئی حج پالیسی دا اعلان کر دِتا، جِس دے تحت رجسٹریشن، ڈیجیٹل ویٹنگ لسٹ، وکھ وکھ حج پیکیجز، پورا ڈیجیٹل نظام تے نجی شعبے دے کردار وِچ مرحلہ وار اضافے دا فیصلہ کیتا گیا۔ ابتدائی طور تے حج خرچے 12 توں 13 لَکھ روپے تجویز کیتے گئے نے، تاہم حتمی لاگت وِچ حالات دے مطابق کمی یا اضافہ ہو سکدا ہے۔
وزیرِ مذہبی امور سردار محمد یوسف نے پالیسی دا اعلان کردے ہوئے دَسیا کہ پاکستان دا مِل کے حج کوٹہ 1 لَکھ 79 ہزار 210 برقرار رہے گا، جبکہ سرکاری تے نجی حج سکیموں دا کوٹہ بدستور بالترتیب 60 تے 40 فیصد ہووے گا۔ تاہم لوڑ پین تے وفاقی کابینہ ایس تناسب وِچ تبدیلی کر سکے گی۔ نویں پالیسی دے تحت پہلی وار حاجیوں نوں چار سال پہلے تک رجسٹریشن دی سہولت دِتی جاوے گی، جِس دے ذریعے اوہ اپنی پسند دے ورھے (سال) لئی صرف متوقع حج خرچیاں دا 10 فیصد جمع کروا کے درخواست رجسٹر کروا سن گے۔
چون (انتخاب) پوری طرحاں شفاف ڈیجیٹل ویٹنگ لسٹ دے ذریعے ’’پہلاں آؤ، پہلاں پاؤ‘‘ دی بنیاد تے کیتا جاوے گا۔ حکومت نے رہائش، ٹرانسپورٹ، کیٹرنگ، ہوائی سفر تے سامان دی ترسیل سمیت اہم خِدمتاں لئی تن توں چار سال تک دے معاہدیاں دی گنجائش وی رکھی ہے تاکہ بہتر منصوبہ بندی، خِدمتاں دے معیار وِچ بہتری تے خرچیاں وِچ کمی ممکن بنائی جا سکے۔
سرکاری حج سکیم دے تحت وکھ وکھ ویلے (دورانیے) دے کئی حج پیکیج وی متعارف کروائے جان گے تاکہ حاجی اپنی لوڑ تے مالی طاقت (استطاعت) دے مطابق انتخاب کر سکن، جبکہ رقم دی وصولی دا کم ترت شروع کیتا جاوے گا۔ پالیسی دے مطابق حج دے سارے مرحلے جیہناں وِچ رجسٹریشن، ادائیگی، نگرانی، شکانتاں دا ازالہ تے حج توں بعد دا جائزہ شامل ہے، پورے طور تے ڈیجیٹل نظام دے تحت کیتے جان گے۔
نجی حج کمپنیاں لئی پرائیویٹ حج مینجمنٹ پورٹل (PHMP) دا استعمال لازمی ہووے گا، جِس دے ذریعے بکنگ، ادائیگیاں، نگرانی تے آڈٹ دا کم کیتا جاوے گا۔ حکومت دا کہنا ہے کہ آئندہ اوہ سِدھے طور تے حج انتظامات چلاؤن دی بجائے نگرانی، ریگولیشن تے معیار نوں یقینی بناؤن تے دھیان دیوے گی، جبکہ نجی شعبے دی شمولیت مرحلہ وار ودھائی جاوے گی۔ نجی حج کمپنیاں دی رجسٹریشن، نگرانی تے اضافی کوٹہ اوہناں دی کارکردگی تے مقررہ معیار تے عملدرآمد نال مشروط ہووے گا، جبکہ سارے مالی لین دین صرف حکومت دے مقررہ بینکاری ذرائع توں کیتے جان گے تاکہ شفافیت تے مالی بچاء یقینی بنایا جا سکے۔
پالیسی وِچ ایہ وی طے کیتا گیا ہے کہ پاکستان تے سعودی عرب وِچ ساری خریداری تے معاہدے متعلقہ سرکاری قواعد دے مطابق کیتے جان گے، جبکہ حج آپریشن پورا ہون توں بعد اگر حاجیوں دی جمع کروائی گئی رقم وِچوں کوئی رقم بچی تاں اوہ اوہناں نوں موڑ (واپس) دِتی جاوے گی۔ سرکاری تے نجی دونوں حج انتظامات دا آزادانہ تھرڈ پارٹی آڈٹ تے جائزہ وی لیا جاوے گا۔
حاجیوں دیاں شکانتاں دے ترت ازالے لئی جدید ڈیجیٹل شکایت نظام، موثر نگرانی تے اپیل دا باقاعدہ طریقہ کار متعارف کرایا جاوے گا۔ معاونینِ حج دی چون (انتخاب) میرٹ دی بنیاد تے ہووے گی، جبکہ تربیتی پروگرام وِچ مناسکِ حج، موبائل ایپس دا استعمال، صحت، ہنگامی حالت نال نپٹن تے سعودی قانوناں بابت آگاہی شامل ہووے گی۔
حجاج محافظ سکیم آئندہ وی برقرار رہے گی، جِس دے تحت حج دے دوران وفات، حادثے یا ہنگامی حالت وِچ مالی مدد دِتی جاوے گی۔ ایس توں علاوہ ایمرجنسی مینجمنٹ سسٹم تے خاص ایمرجنسی رسپانس ٹیم وی قائم کیتی جاوے گی۔
وزیرِ مذہبی امور سردار محمد یوسف نے پریس کانفرنس وِچ کیہا کہ ایہ پاکستان دی تاریخ دی پہلی چار سالا حج پالیسی ہے، جِسنوں وزیراعظم شہباز شریف دیاں ہدایتاں تے سعودی ویژن 2030 نال ملاندے ہوئے تیار کیتا گیا ہے۔ اوہناں دے بقول ایہ صرف اک پالیسی نہیں بلکہ حج انتظامات وِچ بنیادی تے دیرپا اصلاحات دا آغاز ہے، جِس دا مقصد شفافیت، بہتر منصوبہ بندی، جدید ڈیجیٹل گورننس تے حاجیوں نوں عالمی معیار دیاں سہولتاں دِتیاں جانا ہے۔
