اوکاڑا توں پی ٹی آئی آگو عبداللہ طاہر لہور وِچ کلینک تے قتل، ڈاکٹر زخمی
عبداللہ طاہر بغیر سکیورٹی گلبرگ وِچ فزیو تھراپی کلینک تے آئے، ہیلمٹ وِچ منہ چھپائے 2 شوٹر پچھے پہنچ گئے، اندھا دھند فائرنگ، عبداللہ موقع تے چل بسے، ملزم فرار، ماں غم نال بے ہوش، شوٹراں دی فوٹیج منظرِ عام تے آ گئی | مقتول ریت دے ٹھیکیدار تے دوجے کئی کاروباراں نال جڑے سن، کجھ مہینے پہلاں اوکاڑا وِچ وی اوہناں تے قاتلانہ حملہ ہویا سی
لاہور (کرائم رپورٹر، ہیلتھ رپورٹر) غالب مارکیٹ گلبرگ دے علاقے گرو مانگٹ روڈ وِچ فزیو تھراپی کلینک وِچ وڑ کے اوکاڑا توں پی ٹی آئی دے آگو ایم پی اے دے ٹکٹ ہولڈر عبداللہ طاہر نوں قتل کر دِتا گیا، فائرنگ نال ڈاکٹر وی زخمی ہو گیا، شوٹر قتل توں بعد فرار ہو گئے۔
تفصیلاں دے مطابق عبداللہ طاہر فزیو تھراپی لئی کلینک تے آئے سن، 2 موٹر سائیکل سوار جیہناں نے اپنے منہ ہیلمٹ پا کے چھپا رکھے سن، پچھا (تعاقب) کردے ہوئے کلینک دے اندر وڑ گئے تے اندھا دھند فائرنگ کر دِتی، عبداللہ طاہر موقع تے ای دم توڑ گئے جبکہ ملزم واردات توں بعد سوکھے ای فرار ہو گئے، فائرنگ نال علاقے وِچ ڈر تے خوف پھیل گیا، پولیس تے فرانزک ٹیماں جائے وقوعہ تے پہنچ گئیاں۔
زخمی ڈاکٹر ریاض نوں بازو وِچ 2 گولیاں لگیاں، اوہناں نوں سروسز ہسپتال دی سرجیکل ایمرجنسی وِچ منتقل کر دِتا گیا، ڈاکٹراں دے مطابق اوہناں دی حالت خطرے توں باہر ہے۔ مقتول دی ماں، رشتے دار تے سجن بیلی وی جائے وقوعہ تے پہنچ گئے، ماں غم نال بے ہوش ہو گئی، مقتول دے اک رشتے دار دے مطابق عبداللہ طاہر ہمیشہ سکیورٹی گارڈ نال لے کے نکلدے سن پر اوہ کلینک تے گارڈ نال نہیں لے کے آئے جِس نال شوٹراں نوں موقع مل گیا۔ دَسیا گیا ہے کہ مقتول عبداللہ طاہر ریت دے ٹھیکیدار تے دوجے کئی کاروباراں نال جڑے سن، کجھ مہینے پہلاں اوکاڑا وِچ وی اوہناں تے قاتلانہ حملہ ہویا سی، پرانی دشمنی سمیت سارے پہلوآں تے تفتیش کیتی جا رہی ہے۔
دوجی پاسے شوٹراں دی سی سی ٹی وی فوٹیج وی سامنے آ گئی ہے جِس وِچ ہیلمٹ پائے دوناں شوٹراں نوں کلینک دے باہر موٹر سائیکل کھڑی کر کے کلینک وِچ وڑدے ویکھیا جا سکدا ہے جبکہ اوہناں دی بازار توں لنگھن (گزرنے) دی ویڈیو وی سامنے آئی ہے، لاش مردہ خانے منتقل کر دِتی گئی ہے، پولیس دے مطابق پرچہ (مقدمہ) درج کرن توں بعد لاش ورثاء دے حوالے کیتی جاوے گی۔ عبداللہ طاہر دے قتل دا مقدمہ تھانہ غالب مارکیٹ وِچ مقتول دی ماں صفیہ اختر دی مدعیت وِچ 5 نامعلوم بندیاں خلاف درج کر لیا گیا، مقدمے وِچ قتل، اقدامِ قتل سمیت دوجیاں سنگین دفعات شامل نے۔
