مراد علی شاہ ولوں امریکی کاروباری شخصیتاں نوں سرمایہ کاری دی دعوت، ڈیسک قائم

وزیراعلیٰ سندھ نال وفد دی ملاقات، حکومتی تعاون، ریگولیٹری سہولت تے پالیسیاں دے تسلسل دی یقین دہانی | امریکی سرمایہ کاراں دی توانائی، اے آئی، انفراسٹرکچر، صحت، فن ٹیک، صنعتی زونز تے نجی شراکت داری وِچ دلچسپی

کراچی (سٹاف رپورٹر) وزیراعلیٰ سندھ سید مراد علی شاہ نے امریکی سرمایہ کاراں نوں سندھ دی معاشی ترقی دے سفر وِچ لمے ویلے دے (طویل المدتی) شراکت دار بنن دی دعوت دیندے ہوئے اوہناں نوں یقین دوایا کہ سندھ وِچ شفاف، قابلِ اعتماد تے سرمایہ کار دوست کاروباری ماحول موجود ہے، جِس نوں حکومت دی مکمل معاونت، پالیسیاں دے تسلسل تے بین الاقوامی معیار دے پبلک پرائیویٹ پارٹنرشپ (پی پی پی) فریم ورک دی پشت پناہی حاصل ہے۔

وزیراعلیٰ ہاؤس وِچ امریکہ دے منے ہوئے (ممتاز) کاروباری وفد نال اعلیٰ سطح دے اجلاس وِچ خطاب کردے ہوئے مراد علی شاہ نے صوبے دے اسٹرٹیجک محل وقوع، مضبوط صنعتی بنیاد، وافر قدرتی وسائل تے توانائی، ٹیکنالوجی، انفراسٹرکچر، صحت، سیاحت، زراعت تے لاجسٹکس سمیت وکھ وکھ شعبیاں وِچ موجود کھُلّے سرمایہ کاری دے موقعیاں نوں اجاگر کیتا۔

اجلاس وِچ امریکہ وِچ رہن والے منے ہوئے کاروباری آگوآں (رہنماواں)، سرمایہ کاراں، اسپیشل انویسٹمنٹ فیسلی ٹیشن کونسل (ایس آئی ایف سی) دے نمائندیاں، صوبائی وزراء، اعلیٰ سرکاری حکام تے محکمہ سرمایہ کاری و پبلک پرائیویٹ پارٹنرشپ اداریاں دے نمائندیاں نے شرکت کیتی۔ وزیراعلیٰ دے معاونِ خصوصی برائے سرمایہ کاری و پبلک پرائیویٹ پارٹنرشپ قاسم نوید قمر نے پریزنٹیشن دِتی۔

وزیراعلیٰ نے کیہا کہ سرمایہ کاری وِچ وافر (غیر ضروری) رکاوٹاں نوں لگاتار ختم کیتا جا رہیا ہے، سندھ قابلِ تجدید توانائی، جدید ٹیکنالوجی تے ایڈوانس مینوفیکچرنگ وِچ بے پناہ صلاحیت رکھدا ہے۔ اوہناں نے تھر دے وسیع کوئلے دے ذخیریاں، ہوا تے سورجی (شمسی) توانائی دے وڈے وسیلیاں، لمبی ساحلی پٹی، کراچی پورٹ تے پورٹ قاسم دے ذریعے اسٹرٹیجک رابطہ کاری دا ذکر کیتا۔

اوہناں کیہا کہ چاہے تواڈی دلچسپی ٹیکنالوجی، صحت، انفراسٹرکچر، مینوفیکچرنگ، ڈیجیٹل فنانس، زراعت یا ابھردیاں ہوئیاں صنعتاں وِچ ہووے، سندھ ترقی تے کاروباری وادھے لئی اک مضبوط تے اسٹرٹیجک پلیٹ فارم فراہم کردا ہے۔ وفد نوں صنعتی پارکس، دھابیجی اسپیشل اکنامک زون، آبی زراعت (Aquaculture)، سمندری خوراک دی برآمدات، گرین ڈیجیٹل انفراسٹرکچر، صحت دیاں سہولتاں، ایجوکیشن ٹیکنالوجی، سیاحتی ریزورٹس، ویسٹ واٹر ٹریٹمنٹ، ڈی سیلی نیشن پلانٹس تے قابلِ تجدید توانائی نال چلن والے ڈیٹا سینٹرز وِچ سرمایہ کاری دے موقعیاں توں وی آگاہ کیتا گیا۔

امریکی کاروباری وفد دے ممبراں نے خاص طور تے قابلِ تجدید توانائی، مصنوعی ذہانت (اے آئی)، ڈیٹا سینٹرز، صحت، فن ٹیک، ٹیکنالوجی پارکس، صنعتی زونز تے برآمدات تے مبنی صنعتاں وِچ سرمایہ کاری وِچ دلچسپی وکھائی۔

مراد علی شاہ نے امریکی سرمایہ کاراں دی رہنمائی، معاونت تے سہولت لئی محکمہ سرمایہ کاری وِچ خاص فیسلی ٹیشن ڈیسک قائم کرن دی ہدایت دِتی تے وفد نوں حکومتی تعاون، ریگولیٹری سہولت تے پالیسیاں دے تسلسل دی یقین دہانی کروائی۔

اجلاس وِچ وائس پریزیڈنٹ آپریشنز ماہین شمسی، ٹی ایس آئی انجینئرنگ انکارپوریشن دے صدر مقصود کمبوہ، انشور 123 دے بانی زین جیوانجی، وال وک جی ٹی سی دے چیف ایگزیکٹو آفیسر پیٹرک ایبل، امریکن پاکستان ایڈووکیسی گروپ دے صدر علی راشد، فرینڈز آف پاکستان دے چیئرمین عارف ظفر منصوری، فرینڈز آف پاکستان دے صدر جمال خواجہ، پاکستان امریکن شکاگولینڈ چیمبر آف کامرس دے صدر نوید انور، معروف کاروباری شخصیت نعیم زمیندار تے امریکی کاروباری برادری دے دوجے ممتاز ممبر شریک ہوئے۔ اجلاس وِچ صوبائی وزراء، چیف سیکریٹری سندھ آصف حیدر شاہ، میئر کراچی بیرسٹر مرتضیٰ وہاب تے دوجے اعلیٰ سرکاری حکام وی موجود سن۔