کرایہ داری مقدمے وچ یکطرفہ کارروائی دا فیصلہ کالعدم
یکطرفہ کارروائی توں پہلاں 10 دِیہڑے دا وقت دینا لازم: جسٹس مزمل اختر شبیر، کارروائی دے آغاز اُتے 10 دِیہڑے وچ پیروی دی درخواست دائر کرن دا حق: فیصلہ
لاہور (کورٹ رپورٹر) لاہور ہائی کورٹ نے کرایہ داری مقدمات وچ یکطرفہ کارروائی دے طریقہ کار نال متعلق اہم فیصلہ ڈیندے ہوئے درخواست گزار دے خلاف رینٹ ٹربیونل تے اپیلٹ عدالت دے فیصلے کالعدم قرار دتے تے قرار دتا کہ رینٹ کیسز وچ فریق مخالف دے خلاف یکطرفہ کارروائی توں پہلاں قانون دے مطابق دس دِیہڑے دا وقت دینا لازمی اے، جسٹس مزمل اختر شبیر نے 14 صفحات اُتے مشتمل تفصیلی فیصلہ جاری کریندے ہوئے قرار دتا کہ صفائی دا موقع دتے بغیر کرائے دار دے خلاف یکطرفہ فیصلہ نامناسب اے، انصاف وچ تاخیر انصاف توں انکار دے مترادف اے جبکہ انصاف دی فراہمی وچ غیر ضروری جلدی بازی انصاف نوں دفن کرن دے برابر اے، فیصلے وچ آکھیا گیا کہ مخالف فریق یکطرفہ کارروائی شروع ہون توں بعد دس دِیہڑے دے اندر پیروی دی درخواست دائر کرن دا حق رکھدا اے تے جے یکطرفہ کارروائی قانون دے مطابق نہ ہووے تاں ایس دی بنیاد اُتے دتا گیا فیصلہ وی برقرار نہیں رہ سکدا۔
عدالت نے قرار دتا کہ رینٹ ٹربیونل نے یکطرفہ کارروائی توں پہلاں نوٹس دی درست تعمیل یقینی نہیں بنائی تے کرایہ داری قانون وچ درج طریقہ کار اُتے عمل نہیں کیتا، پیروی دی درخواست خارج کرن دا فیصلہ وی قانون دے برخلاف سی، عدالت نے دونویں ماتحت عدالتاں دے فیصلے کالعدم قرار دتے ہوئے حکم دتا کہ مقدمہ ٹرائل کورٹ وچ زیرِ سماعت تصور کیتا جائے تے ٹرائل کورٹ چار مہینے دے اندر میرٹ اُتے فیصلہ کرے، عدالت نے ایہ وی ہدایت کیتی کہ فریقین ولوں التوا دی کوئی درخواست منظور نہ کیتی جائے، عدالت نے رینٹ ٹربیونل نوں فریقین نوں سُن کے قانون دے مطابق اَسرِ نو فیصلہ کرن دی ہدایت کر دتی، آئین ہر شہری نوں منصفانہ تے شفاف ٹرائل دی ضمانت دیندا اے، غیر وضاحتی تے بغیر دلیل دے پاس کیتے گئے احکامات دی قانون وچ کوئی حیثیت نہیں، بنیاد غلط تے باطل ہون اُتے بنی پوری عمارت ڈگ پیندی اے۔
