امریکہ، ایران نوں دوبارہ اسلام آباد معاہدے ولّ لاؤن دی کوشش کر رہے آں: پاکستان
چند روزہ سکون دے باوجود سکیورٹی صورتحال تشویشناک، فریقین زیادہ توں زیادہ تحمل دا مظاہرہ کرن، بات چیت تے سفارت کاری ہی اگے ودھن دا واحد قابلِ عمل راہ: ترجمان دفترِ خارجہ طاہر اندرابی
اسلام آباد (وقائع نگار) ترجمان دفترِ خارجہ طاہر حسین اندرابی نے کیہا ہے کہ امریکہ تے ایران دے وچکار صورتحال نوں معمول تے لیان لئی مذاکرات جاری نے تے پاکستان بھرپور کوشش کر رہیا ہے کہ فریقین نوں دوبارہ اسلام آباد معاہدے ولّ لایا جا سکے۔ پاکستان جنگ بندی برقرار رکھن تے مذاکرات دی بحالی لئی جاری تمام سفارتی کوششاں دا خیرمقدم کردا ہے۔ ہفتہ وار پریس بریفنگ وِچ انہوں نے کیہا کہ پاکستان خلیجی خطے دی موجودہ صورتحال، ایران تے امریکہ دے وچکار کشیدگی، فلسطین، شنگھائی تعاون تنظیم تے علاقائی سفارت کاری سمیت متعدد اہم امور تے سرگرم کردار ادا کر رہیا ہے۔ اگرچہ لنگھے (گزشتہ) چند دِناں دے دوران نسبتاً سکون ویکھن وِچ آیا، تاہم خطے دی مجموعی سکیورٹی صورتحال ہُن وی تشویشناک ہے۔ پاکستان دا موقف ہے کہ تمام تنازعیاں دا واحد قابلِ عمل حل مذاکرات تے سفارت کاری ہے۔
پاکستان ایران تے امریکہ دے وچکار جنگ بندی برقرار رکھن تے مذاکرات دی بحالی لئی جاری تمام سفارتی کوششاں دا خیرمقدم کردا ہے تے ایس سلسلے وِچ اپنا تعمیری کردار جاری رکھے گا۔ انہوں نے دَسیا کہ آبنائے ہرمز وِچ صورتحال نوں معمول تے لیان تے کشیدگی گھٹ کرن لئی مذاکرات جاری نے۔ پاکستان دونوں فریقاں نوں “اسلام آباد مفاہمتی یادداشت” دے تحت دوبارہ مذاکرات دی میز تے لیان دی بھرپور کوشش کر رہیا ہے تاکہ تمام اختلافات نوں ایس معاہدے دی روح دے مطابق حل کیتا جا سکے۔ پاکستان نے تمام متعلقہ فریقاں تے زور دِتا ہے کہ وہ زیادہ توں زیادہ تحمل دا مظاہرہ کرن تے 21 جون دے پاکستان-قطر مشترکہ اعلامیے دے مطابق تکنیکی سطح دے مذاکرات دوبارہ شروع کرن۔
ترجمان نے دَسیا کہ 23 جولائی نوں وزیراعظم شہباز شریف نے سعودی ولی عہد شہزادہ محمد بن سلمان نال ٹیلیفون تے گفتگو کیتی، جِس وِچ دونوں رہنماواں نے بحیرہ احمر، آبنائے ہرمز تے خطے وِچ امن، سلامتی، استحکام تے قانونی بحری تجارت دے بلا تعطل تسلسل لئی قریبی تعاون جاری رکھن تے اتفاق کیتا۔ ایس توں بعد 25 جولائی نوں نائب وزیراعظم اسحاق ڈار نے سعودی وزیرِ خارجہ شہزادہ فیصل بن فرحان نال ٹیلیفون تے گفتگو کیتی، جِس وِچ دونوں رہنماواں نے خطے دی تازہ صورتحال، پاکستان تے سعودی عرب دے برادرانہ تعلقات تے علاقائی امن لئی سفارت کاری دی اہمیت تے زور دِتا۔ 28 جولائی نوں نائب وزیراعظم و وزیرِ خارجہ نے اردن دے نائب وزیراعظم و وزیرِ خارجہ ایمن الصفدی نال وی ٹیلیفونک رابطہ کیتا، جِس وِچ فلسطین دی بگڑدی ہوئی صورتحال، اسرائیلی کارروائیاں دی مذمت تے مشترکہ سفارتی کوششاں تے اتفاق کیتا گیا۔
ترجمان نے کویت دے وزیرِ خارجہ شیخ جراح جابر الاحمد الصباح دے حالیہ دورہِ اسلام آباد نوں انتہائی اہم قرار دیندے ہوئے کیہا کہ دونوں ملکاں نے تجارت، سرمایہ کاری، توانائی، آئی ٹی، زراعت، تعلیم تے صحت سمیت وکھ وکھ شعبیاں وِچ تعاون نوں ہور فروغ دین تے اتفاق کیتا۔ فلسطین دی صورتحال تے گل بات کردے ہوئے ترجمان نے کیہا کہ 24 جولائی نوں اٹھ عرب تے اسلامی ملکاں دے وزرائے خارجہ نے مشترکہ بیان وِچ بیت المقدس، خصوصاً مسجدِ اقصیٰ دے حوالے نال اسرائیلی اقدامات دی شدید مذمت کیتی تے عالمی برادری توں فلسطینی عوام دے حقوق دے تحفظ تے بین الاقوامی قانون تے عملدرآمد دا مطالبہ کیتا۔ انہوں نے دَسیا کہ نائب وزیراعظم و وزیرِ خارجہ نوں مصر دے وزیرِ خارجہ ڈاکٹر بدر عبدالعاطی دا وی ٹیلیفون موصول ہویا، جِس وِچ فلسطین دی صورتحال تے تفصیلی تبادلہِ خیال کیتا گیا۔
دونوں رہنماواں نے فوری جنگ بندی، بلا رکاوٹ انسانی امداد دی فراہمی تے بین الاقوامی قانون دے احترام تے زور دِتا۔ ترجمان دے مطابق پاکستان تے مصر دے وچکار 21 جولائی نوں دسویں سالانہ دوطرفہ مشاورتی اجلاس ورچوئل انداز وِچ منعقد ہویا، جِس وِچ تجارت، سرمایہ کاری، تعلیم، ثقافت، سائنس تے عوامی رابطیاں سمیت وکھ وکھ شعبیاں وِچ تعاون ودھان تے علاقائی و عالمی امور تے قریبی رابطہ برقرار رکھن تے اتفاق کیتا گیا۔ سائنس ڈپلومیسی دے حوالے نال ترجمان نے دَسیا کہ وزارتِ خارجہ نے کامسٹیک دے اشتراک نال 24 جولائی نوں ‘جرنل آف سائنس کمیونیکیشن اینڈ ڈپلومیسی 2026’ دا پہلا شمارہ جاری کیتا، جو ایس اشاعت دا دوجا سال ہے۔ جرنل وِچ سائنس، ٹیکنالوجی تے بین الاقوامی تعلقات دے موضوعات تے 11 تحقیقی مضامین شامل نے، جِہناں وِچ وزارتِ خارجہ دے حکام دے ست مضامین وی شامل نے، جبکہ سیکرٹری خارجہ سفیر آمنہ بلوچ دا مضمون وی ایس اشاعت دا حصہ ہے۔
