فصلاں دی بچی کھچی باڑن دا متبادل: مریم نواز نے بائیو ماس سٹیم پلانٹ دا افتتاح کر دتا
موسمیاتی بہتری لئی بھرپور مدد کیتی جائے گی، ایس لئی کم کرن والے ہر ادارے لئی بوہے کھلے ہن؛ عرس داتا گنج بخش ؒ دے زائرین مہمان ہن، سارے پربندھ پکے کیتے جان، لنگر تے سبیل وچ سوکھ ہونی چاہی دی اے: وزیراعلیٰ
لاہور(نیوز ایجنسیاں) وزیراعلیٰ مریم نواز نے پنجاب وچ ماحولیاتی آلودگی تے سموگ دے خاتمے لئی شیخوپورہ وچ نیسلے فیکٹری دے بائیو ماس سٹیم پلانٹ دا ڈیجیٹل افتتاح کر دتا۔ شیخوپورہ نیسلے فیکٹری وچ جدید ترین بائیو ماس سٹیم پلانٹ تقریباً 45 لاکھ امریکی ڈالر دی سرمایہ کاری نال لایا گیا اے۔ جدید ترین بائیو ماس سٹیم پلانٹ فصلاں دی بچی کھچی (باقیات) باڑن دا ماحول دوست تے پائیدار متبادل ہووے گا۔ جدید ترین بائیو ماس سٹیم پلانٹ ہر ورھے تقریباً 72 ہزار ٹن زرعی باقیات ایندھن دے طور تے ورتے گا، ایس منصوبے نال ایندھن دی مد وچ ہر ورھے تقریباً 21 لاکھ 50 ہزار ڈالر دی بچت ہووے گی۔
وزیراعلیٰ مریم نواز نے پاکستان لئی نیسلے دیاں عوامی خدمات نوں سراہندے ہوئے کہیا کہ بائیو ماس سٹیم پلانٹ پاکستان وچ سرکلر اکانومی تے قابل تجدید توانائی دی وڈی مثال اے۔ ایہہ منصوبہ حکومت پنجاب دی ماحولیاتی بچاء، صاف فضا تے صنعتی ترقی دیاں ترجیحاں نال مکمل رلدا ملدا اے۔ موسمیاتی بہتری لئی بھرپور مدد کیتی جائے گی، نیسلے سمیت موسمیاتی بہتری لئی کم کرن والے ہر ادارے لئی بوہے کھلے ہن۔
دوجے پاسے وزیراعلیٰ مریم نواز نے حضرت داتا گنج بخش علی ہجویری ؒ دے 983 ویں سالانہ عرس مبارک تے خراج عقیدت پیش کردے ہوئے عرس دیاں تن دہاڑیاں دیاں تقریباں دے شروع ہون تے زائرین تے عقیدت منداں نوں مبارکباد دتی تے کہیا کہ حضرت داتا گنج بخش ؒ دے عرس دے موقعے تے سارے پربندھاں نوں پکا کیتا جائے۔ حضرت داتا گنج بخش علی ہجویری ؒ دے عرس وچ شریک ہون والے زائرین دی سہولت تے دھیان دتا جائے، زائرین تے عقیدت منداں دی پرجوش مہمان نوازی دی روایت نوں قائم رکھیا جائے۔
زائرین دی بہترین خدمت لئی لنگر تے سبیل دی ونڈ وچ سوکھ ہونی چاہی دی اے، اوہناں نے زائرین دی سوکھی پہنچ نوں یقینی بناؤن لئی داتا دربار دے آسے پاسے بہترین ٹریفک پربندھاں دا وی حکم دتا تے کہیا کہ عرس تے آؤن والے زائرین ساڈے ملوانگے مہمان ہن، اوہناں نوں کسے قسم دی تکلیف نہیں ہونی چاہی دیے۔ اللہ تعالیٰ سانوں بزرگانِ دین دیاں تعلیمات تے عمل کرن دی توفیق دیوے۔
