پاکستان نوں بحراناں توں کڈھن لئی عمران دی رہائی ضروری: علیمہ
تصادم دی تھاں اتحاد تے امن دی لوڑ اے: ہمشیرہ بانی پی ٹی آئی؛ ورکر اللہ تے تکڑا ایمان رکھن تے اک دوجے نال جڑے رہیں: کوہاٹ، کرک وچ خطاب
پشاور، کرک (مانیٹرنگ ڈیسک، این این آئی) بانی پاکستان تحریک انصاف عمران خان دی بھین علیمہ خان نے کہیا اے کہ ہن نہ کسے نے گولیاں کھانیاں ہن تے نہ کسے نے مارنیاں ہن، شہادتاں لوکاں تے سپاہیاں دواں دیاں ہو رہیاں ہن، ایس لئی لڑائی بھڑائی (تصادم) دی تھاں اتحاد تے امن دی لوڑ اے۔ دیس نوں درپیش سیاسی، معاشی تے امن و امان دے چیلنجاں توں کڈھن لئی عمران خان دی رہائی ضروری (ناگزیر) اے۔
انہاں خیالات دا اظہار اوہناں نے لنگھے دہاڑے کوہاٹ تے کرک شہر وچ سٹریٹ موومنٹ دے سلسلے وچ پارٹی ورکراں دے اکٹھاں نال خطاب کردیاں کیتا۔ علیمہ خان نے کہیا کہ ریاست صرف اداریاں نوں نہیں کہیا جا سکدا کیونکہ ادارے لوکاں دے ٹیکس نال چلدے ہن، ریاست 24 کروڑ لوک ہن، لوکاں نوں غدار یا دہشت گرد قرار دینا ٹھیک طریقہ نہیں۔ ورکر اللہ تے تکڑا ایمان رکھن تے جڑے رہیں، اتحاد ای کامیابی دی ضمانت اے۔
اوہناں کہیا کہ خبراں چل رہیاں ہن کہ عمران خان نوں بلڈ پریشر دا مسئلہ اے، اوہناں دا چھیتی ہسپتال وچ پورا طبی معائنہ کرایا جائے تے ٹھیک علاج دتا جائے۔ عدالتی حُکماں دے مطابق ہر ہفتے 18 بندیاں نوں بانی پی ٹی آئی نال جیل وچ ملن دی اجازت دتی جائے تے کیساں دی چھیتی سماعت کیتی جائے۔
اوہناں مزید کہیا کہ دیس وچ سیاسی بے چینی تے بدامنی دا خاتمہ عمران خان دی رہائی نال ای ممکن اے۔ پارلیمنٹ دے ممبر حکومت نوں امن قائم کرن لئی مقامی آگوآں تے متعلقہ فریقاں وچکار گل بات کرواؤن تے مناؤن، نہیں تاں حالات ہور خراب ہو سکدے ہن۔
