بارشاں دے دوران لوکاں نوں اکلاّ نہیں چھڈاں گے: وزیراعلیٰ سندھ

کراچی (آئی این پی) وزیراعلیٰ سندھ مراد علی شاہ دی صدارت ہیٹھ پی ڈی ایم اے آفس وچ اہم اجلاس ہویا جس وچ بارشاں تے ہنگامی حالت دا جائزہ لیا گیا۔

اجلاس وچ ہن دی موسمی پیش گوئی، بارشاں دے اعداد و شمار، فیلڈ رپورٹس تے متعلقہ اداریاں دی تیاریاں دا وی جائزہ لیا گیا۔ وزیراعلیٰ سندھ نے سارے ڈپٹی کمشنراں، پی ڈی ایم اے، محکمہ بلدیات تے ضلعی انتظامیہ نوں ہائی الرٹ رہن دی ہدایت کر دتی۔ وزیراعلیٰ دا کہنا سی کہ بارشاں دے دوران لوکاں نوں اکلاّ نہیں چھڈاں گے، شہریاں دی جند تے مال دا تحفظ سب توں پہلی ترجیح اے، کسے قسم دی لاپرواہی (غفلت) برداشت نہیں کیتی جائے گی۔

وزیراعلیٰ نے بارش توں متاثرہ علاقیاں وچ ریسکیو، ریلیف تے پانی دی نکاسی دے کم تیز کرن دا حکم دے دتا۔ وزیراعلیٰ نے سارے افسراں نوں اپنے ضلعیاں وچ موجود رہ کے حالات دی نگرانی کرن دی ہدایت کیتی۔ وزیراعلیٰ نے غیر حاضر ٹاؤن آفیسر عمرکوٹ نوں فوری طور تے معطل کرن دا حکم دتا۔

بارشاں دی صورتحال تے وزیراعلیٰ نوں مشیر برائے بحالی گیانچند اسرانی نے بریفنگ دتی۔ مراد شاہ نے نیویں (نشیبی) علاقیاں توں فوری پانی دی نکاسی یقینی بناؤن دی ہدایت کیتی۔