خالد مقبول، مصطفیٰ کمال گروہاں وچ لڑائی، فائرنگ، کئی بندے زخمی: ایم کیو ایم مرکز بہادر آباد نوں تالے، رینجرز تعینات
کِک گروپ دے اجلاس دے دوران دُوجا وی میٹنگ لئی پہنچ گیا، تلخ کلامی مگروں فائرنگ، پتھراؤ، خوف و ہراس، دکاناں بند۔ انیس قائم خانی نے تھپڑ مارے، ایم پی اے اعجاز الحق۔ ٹُر سن سندھ ونڈن گھر نوں سنبھال نہ سکے: ترجمان سندھ حکومت
کراچی (مانیٹرنگ ڈیسک): ایم کیو ایم پاکستان دے خالد مقبول تے مصطفیٰ کمال گروپ دے اختلاف ودھ گئے، بہادر آباد مرکز اُتے پارٹی دے اہم رہنماواں تے کارکناں دے دو گروپاں وچکارشدید جھگڑا تے تصادم دا واقعہ پیش آیا۔ جھگڑے دوران کرسیاں چل گئیاں، شدید فائرنگ تے پتھراؤ دے نتیجے وچ کئی بندے زخمی ہو گئے۔ ہنگامہ آرائی مگروں بہادر آباد مرکز نوں تالے لا دتے گئے، جد کہ رینجرز دی بھاری نفری تعینات کر دتی گئی۔ دسنیا گیا اے کہ ایم کیو ایم پاکستان دے مرکز بہادر آباد وچ اک گروپ اجلاس کر رہیا سی کہ دُوجا گروپ وی باہروں پہنچ گیا۔ تلخ کلامی مگروں فائرنگ شروع ہو گئی، خوف و ہراس پھیل گیا، علاقے دیاں دکاناں بند ہو گئیاں، پولیس موبائلاں موقع اُتے پہنچ گئیاں۔
اس موقع اُتے ایم کیو ایم دے کارکناں نے اک دُوجے دے خلاف نعرے وی لائے، تصادم دے نتیجے وچ زخمی ہون والیاں وچ بہادر آباد مرکز دے ایڈمنسٹریٹر ذاکر حسین تے عامر وی شامل نیں، جد کہ رکن سندھ اسمبلی اعجاز الحق تے دُوجے سینئر ارکان نوں مار کٹائی کیتی گئی تے دھکے دتے گئے۔ ایم پی اے اعجاز الحق نے دسنیا کہ انیس قائم خانی نے مَینوں کمرے وچ تھپڑ مارے، ذاکر حسین نوں ایم پی اے فرحان انصاری تے ہوراں نے تشدد کر کے زخمی کیتا۔ رہنما ایم کیو ایم ڈاکٹر فاروق ستار نے آکھیا کہ بہادر آباد وچ رہنماواں وچکار پارٹی اجلاس مگروں اختلاف ہوئے۔ ایم پی اے اعجاز الحق تے رہنما ذاکر نال دُوجے گروپ دے کارکناں نے ہتھاپائی کیتی، منگلا شرما تے سبین غوری نال وی بدتمیزی کیتی گئی۔ امین الحق نے آکھیا کہ فائرنگ نال ساڈا اک کارکن زخمی ہویا، پتھراؤ نال وی کارکن زخمی ہوئے نیں، دفتر وچ شدید توڑ پھوڑ کیتی گئی اے، ہُݨ ایہ معاملہ اگے چلنا ممکن نہیں اے۔ ایتھے دُوجے پاسے ترجمان سندھ حکومت سعدیہ جاوید نے طنزیہ انداز وچ آکھیا کہ ٹُر سن سندھ نوں ونڈن پر اپنے ای گھر نوں سنبھال نہ سکے، جیہڑے دُوجیاں نوں ونڈن نکلے سن، اَج آپ دھڑے بندی دا شکار ہو گئے نیں۔
