عوام 5 اگست دے احتجاج وچ بھرپور شرکت کرن: سلمان اکرم راجہ
کے پی، سندھ، پنجاب، آزاد کشمیر وچ عوامی رابطہ مہم ہور تیز کرن دی ہدایت، لوک اپنے جمہوری حقاں دی حفاظت لئی گھراں توں باہر نکلن: حلیم عادل شیخ
کراچی (آئی این پی، این این آئی): پاکستان تحریک انصاف دے سیکرٹری جنرل بیرسٹر سلمان اکرم راجہ نے آکھیا اے کہ 5 اگست نوں بانی دی ناحق قید دے تن سال پورے ہون اُتے ملک بھر وچ یومِ سیاہ منایا جائے گا تے تحریک انصاف ولوں ملک گیر پرامن احتجاج کیتا جائے گا۔ اوہناں نے عوام توں اپیل کیتی کہ اوہ اپنے آئینی تے جمہوری حق دا استعمال کردے ہوئے بھرپور انداز وچ احتجاج وچ شریک ہون تے آئین، جمہوریت تے عوامی حاکمیت لئی اپنی آواز بلند کرن۔ بیرسٹر سلمان اکرم راجہ نے آکھیا کہ جیہڑے عناصر نے جمہوریت، آئین تے عدلیہ دی آزادی نوں نقصان پہنچایا، انصاف دا قتل کیتا تے عوام دے ووٹ دی توہین کیتی اوہناں نوں عوام دے اگے جوابدہ ہونا پئے گا۔ اوہناں نے آکھیا کہ عوام نوں کمزور سمجھن تے اوہناں دے بنیادی حق سلب کرن دی سوچ زیادہ دیر قائم نہیں رہ سکدی۔
اوہناں نے آکھیا کہ پاکستان دا آئین ہر شہری نوں بنیادی حق دیندا اے۔ اوہناں نے زور دتا کہ عوام قانون تے آئین دے دائرے وچ ریندی اپنے حقاں دا استعمال کرن تے پرامن انداز وچ اپنی آواز بلند کرن۔ بیرسٹر سلمان اکرم راجہ نے اعلان کیتا کہ خیبرپختونخوا، سندھ، پنجاب، آزاد کشمیر تے ملک بھر وچ عوامی رابطہ مہم ہور تیز کیتی جائے گی تے 5 اگست نوں ہر سطح اُتے بھرپور عوامی احتجاج کیتا جائے گا۔ دُوجے پاسے اتوار نوں کراچی دے ضلع جنوبی دے وکھو وکھ علاقےآں وچ عوامی رابطہ مہم دے دوران حلیم عادل شیخ نے پارٹی رہنماواں تے کارکناں نال رل کے احتجاجی پمفلٹ ونڈے تے شہریاں توں 5 اگست نوں احتجاجی مظاہریاں وچ بھرپور شرکت دی اپیل کیتی۔ اوہناں نے عوام توں اپیل کیتی کہ اوہ اپنے جمہوری حقاں دی حفاظت لئی گھروں نکل کے احتجاج وچ شریک ہون۔ پی ٹی آئی سندھ دے صدر نے الزام لایا کہ پیپلز پارٹی جھوٹے وعدیاں تے پروپیگنڈے دے ذریعے عوام نوں گمراہ کرن دی کوشش کر رہی اے، پر عوام ہُݨ تبدیلی چاہندے نیں تے اصلی عوامی نمائندیاں نوں اگے لیان دا ویلا آ گیا اے۔
