پی ٹی اے: یوفون، ٹیلی نار انضمام اُتے قائم نویں کمپنی دی تفصیل طلب

اسلام آباد پاکستان ٹیلی کمیونیکیشن اتھارٹی (پی ٹی اے) نے یوفون تے ٹیلی نار پاکستان دے انضمام مگروں بنن آلی نویں کمپنی دی پوری تفصیلات منگ لئیاں نیں۔ پی ٹی اے دے مطابق نویں کمپنی دے لوگو دی منظوری اتھارٹی توں لینا لازمی ہووے گی تے منظوری توں پہلاں کسے نویں لوگو یا برانڈ دی تشہیر نہیں کیتی جا سکے گی۔ پی ٹی اے نے یوفون تے ضم شدہ ٹیلی نار کمپنی نوں خط جاری کردے ہوئے نویں کمپنی دے قانونی، مالی، انتظامی تے آپریشنل ڈھانچے نال جڑے سارے کاغذات مہیا کرن دی ہدایت کیتی اے۔ خط وچ آکھیا گیا اے کہ نویں کمپنی دا سٹرکچر، قانون دے مطابق لئیاں گئیاں منظوریاں تے ہور متعلقہ دستاویزات وی جمع کرائیاں جان۔

چیئرمین پی ٹی اے میجر جنرل (ر) حفیظ الرحمن نے گل بات کردے ہوئے آکھیا کہ اتھارٹی نے پاکستان ٹیلی موبائل لمیٹڈ (پی ٹی ایم ایل) تے مجوزہ ضم شدہ کمپنی نوں پہلاں ای ہدایت کیتی سی کہ انضمام دا قانونی کم پورا ہوندے ہی پی ٹی اے نوں باضابطہ طور اُتے دسن۔ اوہناں نے دسنیا کہ کسے وی نویں برانڈ ناں، لوگو یا تشہیری مہم شروع کرن توں پہلاں پی ٹی اے نوں مطلع کرنا تے اس دی منظوری لینا قانونی لوڑ اے۔ اوہناں دا کہنا سی کہ انھاں ہدایات دا مقصد ٹیلی کام شعبے وچ سارے قانونی تے ریگولیٹری تقاضیاں اُتے پورا عملدرآمد یقینی بنانا اے۔