سٹیل سیکٹر لئی بجلی یونٹ اُتے سیلز ٹیکس دا نواں طریقہ لاگو
ڈسکوز نوں یکم جولائی توں نویں شرح اُتے سیلز ٹیکس وصول کرن دی ہدایت، سٹیل میلٹرز تے کمپوزٹ یونٹس دی لسٹ 3 مہینے مگروں اپ ڈیٹ کیتی جاوے گی
اسلام آباد (مانیٹرنگ ڈیسک): فیڈرل بورڈ آف ریونیو (ایف بی آر) نے سٹیل سیکٹر لئی بجلی دے فی یونٹ ورتوں اُتے سیلز ٹیکس دا نواں طریقہ کار لاگو کر دتا اے۔ نویں طریقہ کار دے مطابق مقامی سکریپ ورتن والے سٹیل میلٹرز 30 روپیہ فی بجلی یونٹ سیلز ٹیکس ادا کرن گے۔ 70 فیصد توں زیادہ درآمدی سکریپ ورتن والے یونٹس لئی سیلز ٹیکس 5 روپیہ فی یونٹ مقرر کیتا گیا اے۔ ایس طرحاں ای ایف ایس لائسنس یافتہ سپلائرز توں 70 فیصد توں زیادہ سکریپ لین والے یونٹس اُتے وی 5 روپیہ فی یونٹ سیلز ٹیکس ہووے گا۔
ایس توں علاوہ کیپٹو پاور یا آپ بجلی بناؤن والے سٹیل یونٹس 35 روپیہ فی یونٹ سیلز ٹیکس ادا کرن گے۔ ایف بی آر دے رئیل ٹائم سسٹم نال جڑے اہل یونٹس لئی سیلز ٹیکس 5 روپیہ فی یونٹ مقرر اے جد کہ بجلی دی ورتوں دی بنیاد اُتے دتا گیا سیلز ٹیکس آؤٹ پٹ ٹیکس دے خلاف ایڈجسٹ کیتا جا سکے گا۔ مہینے وچ 5 لکھ یا زیادہ بجلی یونٹس ورتن والے مینوفیکچررز نوں سٹیل میلٹر یا کمپوزٹ یونٹ قرار دتا جاوے گا۔
مقررہ تریخ تک سیلز ٹیکس نہ دین اُتے متعلقہ یونٹ دا بجلی دا کنکشن کٹیا جا سکے گا۔ ایس سلسلے وچ سارے ڈسکوز نوں یکم جولائی 2026 توں نویں شرحاں اُتے سیلز ٹیکس وصول کرن دی ہدایت کیتی گئی اے۔ ایس توں علاوہ سٹیل میلٹرز تے کمپوزٹ یونٹس دی لسٹ ہر 3 مہینے مگروں اپ ڈیٹ کیتی جاوے گی۔ اہل سٹیل مینوفیکچررز دی لسٹ سیلز ٹیکس جنرل آرڈر دے ذریعے جاری کیتی جاوے گی۔
