کساناں توں کنک نہیں خریدی، گھراں تے چھاپے مارے، ہن قیمت قابو توں باہر: ارکان قائمہ کمیٹی
باہروں ارباں دی کنک خریدنی اے زمیندار نوں رقم نہیں دینی: رانا حیات؛ صوبیاں نوں قیمت 3800 کرن لئی کہیا، جواب نہیں ملیا: رانا تنویر؛ بجٹ گھٹ ہوݨ پاروں کھجور منصوبہ کڈھنا پیا: وزارتِ پلاننگ؛ نارووال لئی ہوندا تاں منظور ہو جاندا: نذیر بگھیو؛ ایہوجیہا نہ کہو: چیئرمین کمیٹی۔
اسلام آباد (نامہ نگار) قومی اسمبلی دی قائمہ کمیٹی برائے قومی غذائی تحفظ و تحقیق نوں دسیو گیا کہ باہرلے دیس توں کنک 4200، 4300 روپے فی من پئے گی، وفاقی وزیر نے کہیا صوبیاں نوں چٹھی لکھی کہ جے کنک نہیں مل رہی تاں قیمت 3800 کر دیندے آں پر کسی نے جواب نہیں دتا۔ چیئرمین کمیٹی سید حسین طارق دی صدارت ہیٹھ اجلاس وچ ارکان نے کنک دی صورتِ حال تے تشویش دا اظہار کیتا، رکن رانا محمد حیات خان نے کہیا کہ باہروں ارباں روپیاں دی کنک خرید لینی اے، زمیندار نوں نہیں دینے! ارکانِ کمیٹی نے کہیا کہ کساناں توں کنک خریدی نہیں گئی تے پھر اوہناں دے گھراں تے چھاپے مارے گئے۔
وفاقی وزیر رانا تنویر حسین نے کہیا کہ صوبیاں نے کنک خریدنی سی، میں نہیں! صوبیاں دی مشاورت نال 3500 روپے من کنک دی سپورٹ پرائس مقرر کیتی گئی سی۔ چاراں وزرائے اعلیٰ نوں چٹھی لکھی کہ کنک دی قیمت 3800 کر دیندے آں، کسی نے جواب نہیں دتا۔ ارکانِ کمیٹی نے کہیا کہ صوبیاں ولوں وافر کنک دا دسیو جاندا رہا، ہن قیمتاں قابو توں باہر نیں۔ رانا تنویر نے کہیا صوبیاں توں پوچھو کنک دیاں قیمتاں کیوں ودھیاں! صوبیاں نے چھاپے مارے پر کنک نہیں مل رہی۔ 10 لکھ ٹن کنک منگواؤن (امپورٹ) دا فیصلہ کیتا اے، ای سی سی نے منظوری دے دتی اے۔ صوبیاں نوں اجازت دیاں گے کہ وہ خود کنک امپورٹ کر لین۔ امپورٹڈ کنک 4300 وچ پاکستان اپڑے گی۔ ڈی اے پی کھاد تے سبسڈی دے حوالے نال اج فیصلہ ہو جائے گا۔ پنجاب 100 ارب تے سندھ 60 ارب سبسڈی کساناں نوں دیندے نیں، جے ایہ سبسڈی کنک دی سپورٹ پرائس وچ پا دتی جائے تاں گلاں چنگیاں ہو سکدیاں نیں۔
وزارتِ منصوبہ بندی نے بریفنگ وچ دسیا کہ خیرپور وچ کھجور دی فصل نوں ودھاؤن دا منصوبہ بجٹ گھٹ ہوݨ پاروں کڈھنا پیا۔ رکن نذیر احمد بگھیو نے کہیا کہ کھجور دا منصوبہ جے نارووال لئی ہوندا تاں منظور ہو چکا ہوندا! چیئرمین کمیٹی نے کہیا ایہوجیہا نہ کہو۔ کمیٹی نے ایہ منصوبہ دوبارہ پلاننگ نوں گھلن دی سفارش کیتی۔
پی ایس کیو سی اے حکام نے بریفنگ وچ دسیا کہ فلیور ڈرنکس وچ فروٹ نہیں ہوندا، ایس حوالے نال ٹیکنیکل کمیٹی دے اجلاس جاری نیں۔ رکن کمیٹی رانا حیات نے کہیا کہ فلیور ڈرنک تے امب (آم) بنیا ہوندا اے حالانکہ وہ اوہدے وچ ہوندا ای نہیں، ایہ پاکستان وچ ای ہو سکدا اے، ایہناں فیکٹریاں نوں سیل کیتا جائے۔ حکام نے دسیا کہ لیبل توں فروٹ دی تصویر ختم کیتی جائے گی، تے ایہ وارننگ پرنٹ ہوئے گی کہ تیرہ سال توں گھٹ عمر دے بال ورتن نہیں۔ وفاقی وزیر نے کہیا کہ بوتل والا پانی زیادہ تر غیر معیاری اے۔ این آئی ایچ حکام نے دسیا کہ پلاسٹک بوتل والا پانی دھپ وچ زیادہ چِر رہے تاں کینسر دا باعث بندا اے۔ کمیٹی نے صوبائی فوڈ اتھارٹیز نوں پانی دے نمونے لے کے آؤن والے اجلاس وچ رپورٹ دین دی ہدایت کیتی۔
