سپریم کورٹ بار دی جسٹس مسرت دے اعزاز وچ الوداعی تقریب

کراچی (سٹاف رپورٹر) سپریم کورٹ بار ایسوسی ایشن نے سپریم کورٹ کراچی رجسٹری وچ سپریم کورٹ دی ریٹائر ہوݨ والی جج جسٹس مسرت ہلالی دے اعزاز وچ الوداعی تقریب کروائی، جس وچ چیف جسٹس پاکستان جسٹس یحییٰ آفریدی، سپریم کورٹ دے سینئر ججاں تے سندھ ہائی کورٹ دے چیف جسٹس جسٹس ظفر احمد راجپوت نے شرکت کیتی۔

چیف جسٹس یحییٰ آفریدی دے نال جسٹس منیب اختر، جسٹس جمال خان مندوخیل، جسٹس محمد علی مظہر وی موجود سن۔ سپریم کورٹ بار ایسوسی ایشن دے عہدیداراں تے وکلا نے معزز ججاں دا استقبال کیتا تے جسٹس مسرت ہلالی دی عدالتی خدمات، پیشہ ورانہ دیانت داری تے نظامِ انصاف لئی اوہناں دی وڈی خدمات نوں زبردست خراجِ تحسین پیش کیتا۔ تقریب وچ بینچ تے بار دے ارکان نے جسٹس مسرت ہلالی دی لمی (طویل) تے شاندار عدالتی خدمات نوں سلاہندیاں اوہناں لئی چنگیاں تمناواں دا اظہار کیتا۔

مقررین نے کہیا کہ جسٹس مسرت ہلالی نے فرضاں دی ادائیگی وچ آئین تے قانون دی بالادستی، انصاف دی فراہمی تے عدالتی وقار دے فروغ لئی اہم کردار ادا کیتا۔ ایس موقعے تے سندھ دی ثقافتی روایتاں نوں اجاگر کردیاں سپریم کورٹ بار ایسوسی ایشن ولوں جسٹس مسرت ہلالی، چیف جسٹس پاکستان جسٹس یحییٰ آفریدی تے تقریب وچ شریک سپریم کورٹ دے معزز ججاں نوں اجرک پیش کیتی گئی۔ تقریب وچ بینچ تے بار وچکار پرانے تعلقات، قانون دی حکمرانی، پیشہ ورانہ معیار تے مؤثر نظامِ انصاف لئی مشترکہ عزم دا اعادہ کیتا گیا۔