نجکاری اہداف تے ٹائم لائنز تے عملدرآمد یقینی بنایا جائے: وزیرِ اعظم
پرائیویٹ ایکویٹی فنڈ دے قیام دے حوالے نال لائحہ عمل جلد پیش کرن دی ہدایت
اسلام آباد (نامہ نگار) سرکاری اداریاں دی نجکاری دے عمل وچ پیش رفت بارے جائزہ اجلاس دی صدارت کردیاں وزیرِ اعظم نے کہیا کہ نجکاری پروگرام دے تحت طے شدہ سارے اہداف تے ٹائم لائنز تے عملدرآمد یقینی بنایا جائے، نجکاری دے وکھو وکھ مرحلیاں دی بروقت تکمیل لئی متعلقہ وزارتاں تے ادارے باہمی رابطے نال کام کرن۔ زرعی ترقیاتی بینک دی نجکاری دا طریقہ کار ایس انداز وچ بنایا جائے کہ بینک دا بنیادی مقصد تے زرعی شعبے وچ ایہدا کردار برقرار رہے۔ یقینی بنایا جائے کہ نجکاری توں بعد وی چھوٹے تے درمیانے درجے دے کسانوں نوں زرعی قرضیاں تے مالی وسائل دی فراہمی تے زرعی ترقیاتی بینک دی توجہ برقرار رہے۔
وزارتِ نجکاری نے وزیرِ اعظم نوں اسلام آباد الیکٹرک سپلائی کمپنی (آئیسکو)، فیصل آباد الیکٹرک سپلائی کمپنی (فیسکو) تے گوجرانوالہ الیکٹرک پاور کمپنی (گیپکو) دی نجکاری دے عمل تے وی بریفنگ دتی۔ نجی سرمایہ کاری دے فروغ تے پائیدار معاشی ترقی نال متعلق اجلاس دی صدارت کردیاں وزیرِ اعظم نے کہیا کہ دیس دی معاشی ترقی لئی نجی سرمایہ کاری دا فروغ ناگزیر اے۔ پرائیویٹ ایکویٹی فنڈ معیشت وچ سرمایہ کاری، کاروباری وسعت تے روزگار دے موقعے پیدا کرن لئی اک مؤثر ذریعہ بن سکدے نیں۔ وزیرِ اعظم نے دیس وچ سرمایہ کاری تے چھوٹے تے درمیانے درجے دے کاروبار دے فروغ لئی پرائیویٹ ایکویٹی فنڈ دے قیام دے حوالے نال لائحہ عمل جلد توں جلد پیش کرن دی ہدایت کیتی۔
