الیکشن بائیکاٹ پیپلزپارٹی دا آپشن نہیں، ن لیگ الجھنا نہیں چاہندی
پیپلزپارٹی پسپائی اختیار نہیں کرے گی پر دھاندلی دی بنیاد تے مہم وی نہیں چلے گی (تجزیہ: سلمان غنی)
آزاد کشمیر دے انتخابی عمل وچ دوجے مرحلے دے واضح نتائج توں بعد ہن تیجے مرحلیاں دی اہمیت تے حیثیت گھٹ کے رہ گئی اے تے ایس دی وڈی وجہ مسلم لیگ ن نوں پہلے دو مرحلیاں وچ ملن والی واضح اکثریت اے، دوجے پاسے پیپلزپارٹی آزاد کشمیر دے انتخابی نتائج تسلیم نہیں کر رہی تے دوبارہ انتخاب دا مطالبہ کردی نظر آ رہی اے، اطلاعات تاں ایہ نیں کہ اوہ کشمیر دے الیکشن نوں بنیاد بنا کے ن لیگ تے دباؤ ودھاؤنا چاہندی اے پر مسلم لیگ ن پیپلزپارٹی نال الجھن دی بجائے حکومتی معاملیاں تے ای فوکس کرن نوں ترجیح دے رہی اے، بنیادی سوال ایہ اے کہ آخر بلاول بھٹو زرداری آزاد کشمیر دے انتخابی عمل نوں بنیاد بناؤندیاں مسلم لیگ ن تے اوہدی حکومت تے کیوں چڑھ دوڑے، کہیا جا رہا اے کہ اوہ دوجے مرحلے لئی ووٹراں نوں متوجہ کرنا چاہندے سن، جے کشمیر الیکشن دے دوواں مرحلیاں دا تجزیہ کیتا جائے تاں مسلم لیگ ن سادہ اکثریت حاصل کرن وچ کامیاب ہو چکی اے تے ہن 10 اگست نوں پونچھ ڈویژن دیاں 11 نشستاں لئی انتخاب ہونا اے۔
جیہدے حوالے نال اطلاعات ایہ نیں کہ 8 سپیشل نشستاں وچوں 6 ن لیگ دے پلڑے وچ آؤن گی، جتھوں تک پیپلزپارٹی دے حوالے نال سوال اے کہ اوہ آزاد کشمیر دے انتخابی عمل تے انتخابی نتائج توں بعد پسپائی اختیار کرے گی تاں فی الحال تاں ایہوجیہا نظر نہیں آؤندا پر دھاندلی دی بنیاد تے پیپلزپارٹی دی ایہ مہم زیادہ دیر نہیں چل پائے گی، ویسے تاں کشمیر توں خبر آ رہی اے کہ پہلے دو مرحلیاں دے انتخابی نتائج توں بعد تیجے مرحلے لئی پیپلزپارٹی بائیکاٹ دے آپشن تے غور کر رہی اے جیہدا اشارہ راجہ پرویز اشرف وی دے چکے نیں پر واقفانِ حال دا کہنا اے کہ بائیکاٹ کرنا پیپلزپارٹی دا آپشن نہیں ہوئے گا، دوجے پاسے سابق وزیرِ اعظم نواز شریف نے پارٹی ذمہ داراں نوں کہیا اے کہ صبر توں کام لین، اپنے اصل کام تے توجہ دین تے پیپلزپارٹی تے نظر رکھن کہ اوہ صوبیاں دی ونڈ تے کتھے کھلوتی اے، کیہ کردی اے، مسلم لیگ دے ذمہ داراں نوں ایہ ہدایتاں وی دتیاں گیاں نیں کہ دھاندلی دے الزاماں دے جواباں وچ حقیقت ضرور دسن پر اپنی اتحادی پیپلزپارٹی دی لیڈرشپ نوں ٹارگٹ کرن توں پرہیز کرن۔
