موجودہ نظام توں ترقی کرن والے ایس نوں ناکام قرار دے رہے نیں: عظمیٰ
صوبیاں نال متعلق ابھی تک پارٹی قیادت توں مینوں کوئی مؤقف موصول نہیں ہوا، پیپلز پارٹی دے ہارے تے مسترد لوک انتشار تے فتنے دی سیاست چاہندے نیں: پریس کانفرنس۔
لاہور (سٹاف رپورٹر) وزیرِ اطلاعات و ثقافت پنجاب عظمیٰ بخاری نے کہیا اے کہ جتھوں تک صوبیاں نال متعلق معاملیاں دا تعلق اے، ایس حوالے نال اوہناں نوں ابھی تک پارٹی قیادت ولوں کوئی باضابطہ مؤقف موصول نہیں ہوا، ایس لئی اوہ ایس تے ذاتی رائے نہیں دین گیاں، جے ایس معاملے تے سنجیدہ انداز وچ بات ہوئے گی تاں پارٹی قیادت ای ایس بارے فیصلہ کرے گی، جس غیر سنجیدہ انداز وچ نظام دے خاتمے تے ناکامی دیاں گلاں کیتیاں جا رہیاں نیں، اوہ خود سوالیہ نشان نیں۔ جو لوک ایسے۔ ای نظام دا حصہ بن کے ترقی کردے رہے، اوہی اج ایسے۔ ای نظام نوں ناکام قرار دے رہے نیں، جد کہ جنہاں اداریاں تے شعبیاں دی ذمہ داری اوہناں کول اے اوہناں دی کارکردگی وی سبھ دے سامنے اے۔ ڈی جی پی آر وچ پریس کانفرنس کردیاں اوہناں نے مزید کہیا کہ آزاد کشمیر دے عوام نے خدمت، ترقی تے کارکردگی دی سیاست نوں ووٹ دتا، ہر کشمیری ووٹر پنجاب ورگی ترقی دا خواہاں اے، آزاد کشمیر وچ مسلم لیگ (ن) نوں 1 لَکھ توں زائد جد کہ پیپلز پارٹی نوں صرف 2 ہزار توں زائد ووٹ ملے، مسلم لیگ (ن) دے امیدوار بھاری اکثریت نال کامیاب ہوئے نیں۔
عظمیٰ بخاری نے کہیا کہ پیپلز پارٹی کول اپنے 18 سالہ دورِ حکومت وچ عوام نوں دسن لئی کچھ نہیں، پیپلز پارٹی نوں اپنی کارکردگی انتخابی مہم دے آخری مرحلے وچ اشتہاراں دے ذریعے یاد دواؤنی پئی، پنجاب وچ پیپلز پارٹی دے ہارے تے مسترد لوک انتشار تے فتنے دی سیاست چاہندے نیں۔ وزیرِ اطلاعات نے کہیا کہ کشمیر دے انتخابی عمل وچ پیپلز پارٹی نے سندھ دے وسائل دا بے دریغ استعمال کیتا، ایس دے تن ایم این ایز اسلحے نال پولنگ سٹیشناں وچ داخل ہوئے، پیپلز پارٹی دے بعض ارکان ایس حد تک ڈگ چکے نیں کہ اوہ پی ٹی آئی پارٹ ٹو بن گئے نیں۔ وزیرِ اطلاعات نے کہیا کہ ایہ جو بار بار کہندے نیں کہ ایہ فارم 47 دی حکومت اے تاں ایس نوں لَت کیوں نہیں مار دندے؟ جے واقعی اوہ اپنے دعوے تے یقین رکھدے نیں تاں پھر صدرِ مملکت، گورنرز تے دوجے آئینی عہدیاں توں وی استعفے دواؤن، پنجاب دی سیاسی صورتِ حال مکمل طور تے مستحکم اے۔ ایس توں علاوہ عظمیٰ بخاری نے چیئرمین پیپلز پارٹی دے بیان تے طنزیہ ردِعمل دا اظہار کردیاں کہیا اے کہ “اف اسیں ڈر گئے، ہن کیہ ہوئے گا؟”۔ واضح رہے بلاول نے کہیا اے کہ “میرا مسلم لیگ نواز دے دوستاں لئی بس اتنا پیغام اے کہ تہانوں اوہ آواز سنائی دے رہی اے!! ذرا غور نال سنو! ٹک ٹاک ٹک ٹاک، تہاڈی الٹی گنتی شروع ہو چکی”۔
