دہشت گردی دے خلاف فیصلہ کن مرحلہ جاری: سہیل آفریدی

وفاق دیاں ناقص پالیسیاں دا خمیازہ پختونخوا دے عوام تے پولیس بھگت رہی اے

پشاور (مانیٹرنگ ڈیسک) وزیرِ اعلیٰ خیبر پختونخوا سہیل خان آفریدی نے کہیا کہ وفاق دیاں ناقص پالیسیاں دا خمیازہ خیبر پختونخوا دے عوام تے پولیس بھگت رہے نیں۔ دہشت گردی دے خلاف جنگ وچ خیبر پختونخوا پولیس دے جواناں تے معصوم شہریاں دیاں قربانیاں رائیگاں نہیں جان گیاں۔ میڈیا نال گفتگو کردیاں اوہناں نے کہیا کہ امن لئی خیبر پختونخوا دے عوام، پولیس تے ساریاں سیاسی و مذہبی قوتاں نوں متحد ہو کے کھلوونا ہوئے گا۔ دہشت گردی دے خلاف فیصلہ کن مرحلہ جاری اے تے ایس دا جڑ توں خاتمہ ساڈی منزل اے۔ خیبر پختونخوا پولیس تے عوام دے تحفظ لئی ہر حد تک جاوام گے۔

خیبر پختونخوا پولیس تے سی ٹی ڈی نوں دہشت گردی دے خلاف جنگ لئی تمام تر وسائل فراہم کیتے جا رہے نیں۔ خیبر پختونخوا پولیس دی استعدادِ کار ودھاؤن لئی 20 ارب روپے مختص کیتے گئے نیں۔ خیبر پختونخوا پولیس پچھلے 22 ورھیاں توں دہشت گردی دا بہادری نال مقابلہ کر رہی اے تے ساڈی پولیس اک باصلاحیت، نڈر تے بہادر فورس اے۔ خیبر پختونخوا وچ امن دی بحالی لئی صوبائی حکومت اپنی پالیسی تے موثر انداز وچ عمل کرے گی۔ خیبر پختونخوا وچ امن بحال کر کے دکھام گے۔ مالی سال 2026-27 امن، ترقی تے خوشحالی دا ورھا ہوئے گا۔